3651/2024-2025

2024 Pawltlak thla ni 23: Vawiin khan Lunglei District Bawrhsap, District Level Advisory Committee on Safe Food & Healthy Diets Chairman Pi Navneet Mann chuan Krismas leh Kumthar lo thleng tura Lunglei District huam chhunga kohhran hrang hrangte'n ruai an buatsaih turah ei leh in te a lo thianghlim a, ei sual (food poisoning) laka kohhran mipuite an lo him tlan theih nan he'ng a hnuaia tar lan te hi zawm ṭheuh turin mipuite ngenna thu a chhuah.

Sa talh chungchanga hriat turte:

1. Sa talh turte Vety Doctor-in talh a nih hma (ante mortem) leh talh a nih hnu (post mortem) endikna nei thei se duhthusam a ni.

2. Food Safety lam aṭanga thlirin temperature 5-60°C hi 'Danger Zone' a ni a, bacteria lo inthlah pungin, tur (toxin) an siam chhuak ṭhin a, chu vangin fridge-ah ṭha taka kan dah theih loh chuan kan sa talhte hi a niah ngei siam nghal theih ni se duhthusam a ni. Sa kan chhuan so bawrh bawrh hian bacteria-te chu thi mah se, toxin-te hian sâ an ngam a, an thih har em em avangin ei hmaa ṭha taka chhuan so leh tur a ni.

3. Vawk bawl, bawng bawl kan tih te hi sati-ah rulhut tui a awm tihna a ni a, paih ngei ngei tur a ni.

Ruai ṭhehna leh ruai tur siamnaa hriat turte:

1. Tui thianghlim chauh hman tur a ni.

2. Ei rawng bawlna hmunhma leh bungbel thianghlim taka vawn tur a ni.

3. Ei rawng bawltute'n kut fai taka sil tur a ni a, Apron leh lukhum hman ngei ngei tur a ni.

4. Sa chi hrang dah hran tur a ni a, hmanrua pawh hman pawlh loh tur a ni.

5. Mihring hriselna a inchen loh avangin, huat theih thil 'allergen' ni thei chi hman loh a him.

6. Sa leh thlai channa hmanrua hman ṭawm loh tur a ni.

7. Sa siam te a hmin ṭha hle tur a ni a, chawhmeh siam sa (hmin tawh) leh siam loh (a hel) dah hran tur a ni.

8. Chawhmeh siam hmin sa, tam tham deuh, fridge-a dah ṭhat dawnin sem darh lova a hlawma dah hian a vawt rual lo va, ei tur a chhe thei. Chu vang chuan bawm/bel te zawkah ṭhen hrangin fridge-ah dah ṭhat tur a ni.

9. Tho, vut nawi leh thil khuin a bawm loh nan ei tur siam sate chhin/khuh hram hram tur a ni.

10. Kut lawngin ei siam hmin sa khawih loh tur.

11. Hritlang, khuh, hahchhiau, hnap sut reng leh pum lam fel lo leh kawṭhalo te chu fatu leh ei siama ruat loh tur an ni.