DIRECTORATE OF INFORMATION & PUBLIC RELATIONS, Government of Mizoram, India

731/2025-2026

Lunglei, 2025 Nikir thla ni 5: Nimin khan Lunglei District Bawrhsap Pi Navneet Mann kaihhruaiin inspection team chuan Lunglei - Tlabung kawng, National Highway 302 kawngpui laih zauh leh siam ṭhat hna thawh meka Sazaikawn leh Hauruang inkara hna thawh mek dinhmun leh tun hnaia nasa taka ruah surin lei min leh harsatna a thlen hrang hrangte chu a hmunah kal chilhin an enfiah a. Harsatna thleng mek chin fel dan tur leh furpui lo thlen hun atana inpuahchah lawkna tur kawng hrang hrang an ruahman.

Inspection team-ah hian Lunglei Municipal Council Ward V Councillor, Additional DC (E), Disaster Zonal Officer, DSP (Hqtrs), NHIDCL General Manager (P), LA Branch Project Engineer, BRN Infrastructure Pvt. Ltd Project Manager, Sub-Headquarters YMA ai awhte leh Sazaikawn leh Hauruang Local Council leh Branch YMA ai awhte an tel a. Tun hnaia ruah sur vanga lei minna hmun hrang hrang leh kawng leh leilung tana leivung paihna him lo laite enin, him zawk leh chak zawka leivung/chirh then fai dan tur an ruahman a. Furpui tak tak lo thlen huna lirthei veivak leh mihringte tana him lo leh hlauhawm thei tur, lung tla leh lei min hlauhawmna laite chu thian fai a, a venna lungrem siam tur te, kawng sira leivung leh chirh la awmte pawh a rang thei ang bera tifai tur te'n NHIDCL leh company te chu hrilh an ni a. He lai kawng hi khawthlang lam tana kawngpui pawimawh a nih avangin furpui lo thlen huna harsatna a awm loh nan uluk taka vil zui reng ni se, an ti a ni.

Nimin vek khan Disaster Zonal Officer (Serkawn) Pu Beitlotha Nohro (Settlement Officer) kaihhruaiin DIPRO, Geology & Mining Department mi thiamte, police leh Serkawn Local Council Chairman te chuan tun hnaia ruah sur vanga Serkawna Baptist Guest House ep kawng thlanga Pu H. Lalduhkima in (Pu NT Hrangkima te luah lai) bula lei minna hmun chu an enfiah bawk a. He lai lei min leh lei tawlh hian Pu H. Lalduhkima in panna kawng hi a hnawl bakah, an in bul, kawmthlang leh kawmchhak lamah lei min leh lei khi a siam nual a, a in luahtu Pu NT Hrangkima te chhungkua (member 8) pawh hmun him zawkah an inthiar chhuak tawh nghe nghe a. Chhiatna lian zawk a thlen lohna tura inven dan tur leh hma lak zui dan tur hriat thiam theih nana leilung dinhmun zir chiang turin inspection hi kalpui a ni a. Inspection team hian an zir chianna report hi DC-ah theh lutin, hma lak zui dan tur ruahman a ni ang.

Attachment