1156/2024-2025

2024 Vawkhniahzawn thla ni 11: Vawiin chhun khan Lunglei District Deputy Commissioner (Bawrhsap) thar Pu R. Lalṭhazuala chuan a office chamber-ah Mizoram Journalists' Association (MJA), Lunglei District; Village Council Association, Lunglei leh tlawmngai pawl hrang hrang - Young Mizo Association (YMA), Lunglei Sub-Headquarters; Mizo Hmeichhe Insuihkhawm Pawl (MHIP), Lunglei Sub-Headquarters leh Mizoram Upa Pawl (MUP), Lunglei District Headquarters hruaitute inhmelhriatna leh khawtlang thil pawimawhte sawi hova thingpui in hona a neihpui.

Lunglei District Bawrhsap Pu R. Lalṭhazuala chuan Lunglei District hnuaia Hnahthial a awm laiin Hnahthialah a lo awm tawh avangin Lungleiah chuan a intihmikhual loh thu leh kohhran lamah pawh a intah luh nghal thu a sawi a. MJA, VC Association leh tlawmngai pawl hruaitute nen inhmelhriatna neih paha khawtlang ṭhatna tur leh an ngaih pawimawh  zawng te ngaihthlak a duh avanga inhmuh khawmna chu buatsaih a nih thu sawiin, kal khawmte chu Lunglei District tana hma lak dan turah fin chhuah a, thurawn pe turin a sawm a. Lunglei District hmasawn nan theih tawp a chhuah tur thu sawiin, pawl hrang hrangte nen thawh hona ṭha tak neih a duh thu leh mipuite harsatna su kiang a, an mamawh anga hna thawhsak a tum thu a sawi a. A ngaih pawimawh thil tam tak zingah bawlhlawh paih leh sawngbawl chungchang te, sawrkar sum renchem te, mipuite'n harsatna an tawh loh nana kawngpui (highway) vil ṭhat leh khuarel chhiatna thlen thulha a rang thei ang bera chhawmdawlna kalpui te chu a ngaih pawimawh zual a nih thu a sawi.

MJA, VC Association leh NGO hruaitute chuan Lunglei District hmasawn  nana an ngaih pawimawh zual, hma lak hmasak ngai nia an hriatte chu Bawrhsap hnenah hian an thlen a. Raltlan chungchang te, ruihhlo hluar lutuk do tura hma lak chungchang te, NH-54 leh NH-302 hna thawh, Aizawl-Thenzawl-Lunglei kawngpui ṭha zawk a awm theih dan tur te, Lunglei khawpui traffic felfai zawka kalpui a nih theih dan tur leh khuarel chhiatna thila chhawmdawlna (compensation) pawisa pek chhuah chungchangah te hma laksak turin an ngen a ni.

He inkawm honaah hian District Bawrhsap hi Additional Deputy Commissioner pahnih - Pu James Miahlung leh Pi Rochuangkimi Khenglawt  te'n an ṭawiawm a. District Administration leh pawl hrang hrangte'n District hmasawnna tura thawh hona ṭha tak an neih theih nana thil pawimawh hrang hrangte sawi ho a ni bawk.