2783/2025-2026

Lunglei, 2025 Pawltlak thla ni 30: Kumin December ni 26-a India rama naupang (kum 18 chin hnuai lam) chawimawina sâng ber, "Pradhan Mantri Rashtriya Bal Puraskar 2025" dawngtu Lunglei College Veng naupang, Esther Lalduhawmi Hnamte chu vawiin khan Lunglei District Bawrhsap Pi Navneet Mann chuan a hna thawh pindanah lawmpuina hlanin, thingpui a inpui.

Lunglei DC Office hminga Esther Hnamte lawmpuina hlannaah hian Additional Deputy Commissioner Pi Rochuangkimi Khenglawt leh Sub-Deputy Commissioner Pi Lalhlimpuii Pachuau te pawh telin, Esther Hnamte hi a nu, Pi R. Lalawmpuii leh an chhungte'n an ṭawiawm a ni.

Esther Hnamte-in Rashtriya Bal Puraskar 2025 a dawn lawmpuina leh chawimawina atan Lunglei Bawrhsap Pisa hian chawimawina thuziak (certificate of honour) bakah, lawmpuina pawisa fai ₹10,000/- an hlan a. Bawrhsap Pi Navneet Mann chuan Esther Hnamte chu Lunglei leh Mizoram tihmingṭhatu a nih bakah, zai hmanga ram leh hnam inpumkhatna atana thawktu a nih thu sawiin, chhuanawm a tih thu a sawi a. Rashtriya Bal Puraskar chawimawina dawn pawh chu phu a tih thu leh a lawmpui tak zet thu a sawi a. A zirna leh a zaina kawngah theih tawp chhuah zel tura chahin, duhsakna a hlan.

Esther Hnamte nu, Pi R. Lalawmpuii chuan Esther Hnamte-in mi hriat a hlawh theihna tur leh duhsakna leh chawimawina hrang hrang a dawn theihna tura buaipuitu leh thlawptu zawng zawng chungah lawm thu a sawi a. Rashtriya Bal Puraskar chawimawina dawng thei tura Lunglei DC-in rawtna leh fak mawina (recommendation) ṭha tak an ziahsak avang te, award a dawn hnua an ngaihsak zuina avang te'n lawm thu a sawi.

Bawrhsap leh official-te hian Lungleia kum 2026 Republic Day lawmnaa zai turin Esther Hnamte hi an sawm nghal a. Rokhawlhna dang a awm loh chuan zai turin an inbe fel nghal a ni.