No.3544/2021-2022

Dated Aizawl,the 4th January, 2022: Lunglei District huamchhunga kum 15-18 inkar thalaite Covid-19 vaccine pek chhuah dan tur ngaihtuah ho turin vawiin khan Lunglei DC Conference Hall-ah Lunglei DC & Chairman, DLTF on Covid-19 Pu Kulothungan A kaihhruaiin meeting neih a ni.

Lunglei DC & Chairman, DLTF on Covid-19 Pu Kulothungan A chuan Lunglei District chu Covid-19 vaccine pek chhuah kawngah Mizorama ti tha berte zing ami ni mekin Target population 1,04,897 atangin first dose 99,501 (94.9%) leh 2nd dose 84,633 (85.1%) pek chhuah an ni tawh thu sawiin thahnemngai taka hmalatu H&FW Department thawktute bakah DLTF leh VLTF member-te chungah lawmthu a sawi a ni. Tun hnaiah India ram hmun hrang hrangah Covid-19 hri kai hmuhchhuah nasa takin an pung chho leh meka, Lunglei District chhungah ngei pawh case a pung chak leh hle tawh a ni tiin District mipuite chu Covid Appropriate Behavior (CAB) ngai pawimawh chhunzawm zel tur leh vaccine la thei zawng zawngte chu la ngei turin a chah bawk a ni.

Lunglei District Immunization Officer leh SMO ni bawk Dr Lalrinthangi chuan report pe in kum 15-18 inkar thalaite hi sawrkar laipui ruahmanna siam angin Covaxin pek an nih tur thu a sawi a. H&FW Department in an chhut danin Lunglei District huamchhungah vaccine la thei Target Population kum 15-18 inkar mi 9532 an awm a ni. Covid-19 vaccine full dose la tawh Healthcare worker, Frontline worker leh kum 60 chunglam natna dang (comorbidity) nei te tan January ni 10, 2022 atangin Booster Dose pek chhuah tum a ni bawk.

Lunglei District huamchhunga kum 15-18 inkar Covid-19 vaccine pek chhuah dan tur chu hetiang hian ruahmanna siam a ni. Covaxin hi naktuk January ni 5, 2022 ah Aizawl atanga rawn phurh phei tum niin naktuk vek hian vaccine pe chhuak tu tur healthcare workers te tan Orientation program buatsaih a ni ang. Vaccine hi January ni 6, 2022 atanga pek chhuah tum niin a hawnna program chu Govt High School, Chanmari Lungleiah chawhma dar 11 ah neih a ni ang. H&FW Department leh School Education Department-te tangkawpin veng leh khaw tina pek chhuah dan tur ruahmanna mumal tak Vaccination Schedule siam a ni dawn a. Lungsen BDO leh Bunghmun BDO kaihhruaiin an RD Block huamchhunga hmalak dan tur Action Plan siam a ni bawk ang.

Meeting-ah hian H&FW Department, School Education Department, Lunglei DC Officer-te, Bunghmun BDO, Lungsen BDO leh Sub Hqrs YMA Lunglei hruaitute an tel a ni.