Nimin chawhnu khan Lunglei District chhunga Education lama hmalakna thar pawimawh tak ‘Mentoring Project’ sawihona hun Lunglei DC Pi Lalzarmawii, IAS hovin a Office Chamber-ah neih a ni. Lunglei District chhunga Education Department hotute leh MSU leh MZP aiawhte he thutkhawmnaah hian an tel. 

Education Mentoring Project hnuaiah hian Mizorama hmasa ber ni turin Lunglei District chhunga Department hrang hrang officer-ten zirna school-te tlawhin zirlaite an kaihruai dawn a, anmahni thiam zawng leh tui zawng mila eizawnna kawng an dap thiam theih nan an tanpui dawn a ni. He hmalakna hi Lunglei District Education Committee (DEC) meeting 14^th July, 2017-a School Education Parliamentary Secretary Pu Joseph Lalhimpuia leh Lunglei DEC Chairman Pi Lalzarmawii hova an thutkhawm tuma an thurel bawhzuina niin Lunglei DC telin Officer rual ten School ah te kalin Lecture an pe thin dawn a ni. 

Pi Lalzarmawii chuan ram leh hnam hmasawn zelna atan zirna kan ngaih pawimawh hmasak ber a tul a ni tiin tun dinhmunah Mizoram chhungkaw tam zawk ten sum leh tha an sen hnemna ber chu fate education a ni chu lawmawm a tih thu a sawi a. Sawrkar pawhin zirna ngai pawimawhin SSA, RMSA leh scheme dangte hmangin zirna kawngah chak takin hma a la chho mek a. He kan inpekna leh zirna lama kan in senso te hian naktuk atan rah tha tak a neih theih nan zirlaite kaihhruai kawngah tan kan lak lehzual a tul a ni tiin zirlai hruaitute chu sawrkar hnenah thurawn pe fo thin turin a sawm nghal a. Lunglei DC chuan a sawi zel naah school hrang hranga zirna hmanrua awmsa, sawrkarin a pek te chu zirtirtuten an hman tangkai a tul a ni, a ti bawk. He Mentoring Project-in a tum ber chu Lunglei District chhunga zirlaite rilru chawkphura, zirna kawnga inelna tha (Competitive Spirit) nasa zawka an neih chhoh theihna tura duna a ni, a ti. 

Lunglei District Education Department hotute pawhin thu sawiin hemi kawnga an hmalak dan tlangpui an tarlang a. He Mentoring Project neih tur hi school engemawzat hriattir tawhin zirlaite routine tibuailo tura ruahmanna siam an tum thu an sawi a. Zirtirtute pawhin kaihhruaina leh fuihna thar an mamawh thu sawiin zirtirtute tan programme buatsaih a tul an tih thu committee ah hian an thlen bawk.