No.6374/2020-2021

Covid-19 hripui darh chak tak leh inkaichhawn zel tur chhut chah anih theihna tur leh mipui te’n Covid-19 avanga khuahkhirhna siamte zawma nunphunga an neih theihna tura ruahmanna Mizoram sawrkarin a duan Covid-19 ‘No Tolerance Fortnight’, October Ni 26 atanga tana November Ni 9, 2020 thleng awh tur chu Lunglei District-ah khauh taka kalpui mek a ni. Hemi rual hian Covid-19 chungchanga himna tura inzirtirna Jan Andolan Campaign chu kalpui mek zel ani bawk.

Nimin khan Lunglei DC & DLTF Chairman Pu V.Lalsangliana kaihhruaiin a office chamber-ah thutkhawmna neih niin Lunglei District-a Covid-19 No Tolerance Fortnight kalpui dan tur chipchiar taka sawiho a ni. No Tolerance Fortnight neih chhunga Covid-19 Executive Duty tur sawrkar department tin atanga thawktu za zela 30 ruatte chu Team 24 ah then niin an duty dan turte siamfel a ni a. Team tin hian Team Leader neiin Covid-19 laka invenna chungchanga inkaihhruaina chu zau zawka mipuite hnena hrilhhriain inkaihhruaina zawmlo te chu ngaihnatthiamna tello in pawisa an chawi tir ang. Covid-19 Executive Duty-te hian The Mizoram (Containment and Prevention of Spread of Covid-19) Act, 2020 in mipuite zawm tura a duan leh sawrkar thupek chhuahte khauh takin an kengkawha, dan bawchhia mante chungah hremna lekkawh niin, challan felfai tak siamin pawisa chawi tur bituk zat an chawi tir zel a ni.

Lunglei District chu bial pariat (8) ah then niin bial pakhat theuh vil turin Executive Magistrate/Incident Commander ruat fel an ni bawk. Vawiin atang khan veng tin VLTF-te nen tangkawpin Lunglei District chhungah Covid-19 Executive Duty hi neih tan a ni.

Covid-19 No Tolerance Fortnight chhung hian Covid-19 hrileng chungchang hriattur hrang hrang mipuite hriattir nawnna Talkshow Local Cable kaltlanga buatsaih a ni ang. Lunglei khawpui chhung hmun lun lai ah Covid-19 laka invenn achungchang banner tar chhuah a ni bawk. Covid-19 laka invenna leh inkaihhruaina te chu Veng/Khua hrang hrangah nitina vawi thum (3) tlangau thin turin VLTF te ngen an ni bawk.