No.1876/2020-2021

Vawiin khan Lunglei DC leh District Task Force on Covid-19 Chairman ni bawk Pu V.Lalsangliana, IAS hovin Lunglei DC Conference Hall-ah Covid-19 positive hmuchhuah thar chungchang sawiho turin Lunglei District media mi te nen Press Meet neih a ni. Press meet ah hian Lunglei DC Pu V.Lalsangliana, SP Pu Stephen Lalrinawma, CMO Dr Thani Pachuau, Medical Superintendent DR SR Ngurchamliana te an tel a ni.

Lunglei DC chuan report pein nimin 09.06.2020 (Tuesday) ah ZMC atanga RT-PCR Test Result a chhuak a, Lunglei District ah mi 43 Covid 19 positive hmuhchhuah belh niin a hmaa mi 2 Covid-19 positive awmsa  nen a vaiin tun dinhmunah Lunglei District ah Covid-19 positive mi 45 an awm mek a ni, a ti. Lunglei DC chuan “Lunglei District-in hetiang boruak kan tawng hi pawi ka ti hle a, chutih rualin mipui te, nu leh pa leh chhung leh khat te chiai lo turin ka ngen a, kan positive neih te hi kum la naupang hrisel tha lai an ni a, an dinhmun hlauhtawhnawm a ni lova, Medical team thiam takin chhun zan zawmin an vil reng dawn a. Theih tawp kan chhuah tlang anga dam tha leh thuai turin kan beisei a ni” a ti.

Covid-19 vei hmuh chhuah thar te hi hmeichhia 15 leh mipa 28 an ni a. Heng mi 43 te hi Quarantine Centre hrang hrang a awm lai an ni:

1) Lunglei Govt College                 -35
2) Eklavya, Pukpui                         -3
3) GHS Chanmari                           -2
4) BCM, Electric Veng CQC          -2
5) Home Quarantine                     - 1 

Covid-19 positive hmuhchhuah thar te hi Delhi atangin mi 24, Goa atangin 6, Noida atangin 2, West Bengal atangin 2, Chhattisgarh atangin 2, Haryana atangin 1, Nagpur atangin 1, Karnataka atangin 3, Punjab atangin 1 leh Maharastra atangin 1 te an ni. Delhi, Haryana, Noida, Goa leh West Bengal te hi 31.5.2020 zanah Lunglei lo thleng te an ni a. Chhattisgarh leh Nagpur hi 1.6.2020 zinga Lunglei lo thleng an ni. Punjab leh Maharastra hi 2.6.2020 a lo thleng an ni a. Karnataka hi 30.5.2020 a lo thleng an ni.

Lunglei District ah Covid-19 positive case thar 43 lai an awm tih hriat veleh hian Medical Team, Police leh Magistrate ten a tul anga hma la nghalin Lunglei Govt. College chu Covid Care Centre (CCC) atan Mizoram Epidemic Disease (Covid 19) Regulations 2020 hmanga puan nghal a ni a. Covid-19 positive thar mi 43 te hi Lunglei Government College CCC ah dah khawm nghal niin Lunglei Government College a awmsa positive ve lo te chu lak chhuah niin Government Quarantine Facility dangah sawn nghal an ni bawk. Lunglei Government College Covid Care Centre hi damlo 80 leng tura ruahman nghal a ni.

Covid-19 positive te lo awmna Quarantine Centre te chu phalna nei lo leh duty ni lo te tana tlawh pawh theih loh turin Mizoram Epidemic Disease (Covid-19) Regulations 2020 angin Containment area a puan nghal a, venhim nghal a ni a, Disinfection team ten damdawiin an ti faia an sawngbawl nghal bawk a ni.

Hetiang dinhmun a lo nih takah chuan ETC, SIRD Pukpui a Covid Care Centre chu Dedicated Covid Health Centre (DCHC) atana puan/declare nghal a nih thu Lunglei DC chuan a tarlang bawk. Tin, Lunglei District Covid – 19 vei hmuhchhuah tawh mi 45 te hi an dinhmun a tha a, Lunglei ah enkawl chhunzawm rih tum an ni a. Medical team - Doctor leh Nurse ten 24 hours in an vil reng dawn a. Tin hemi bakah hian Consultant team din nghal niin Specialist doctor pathum - Dr SR Ngurchamliana, Medicine, Dr Isak Lallawmkima, MD leh Dr Lalfakzuala Renthlei, MD ten uluk takin an vil pui nghal a ni. Contact tracing pawh tih nghal niin tuna damlo tena kalkawnga an rawn chuan pui te leh contact an neih pui te chhui chhuah mek zel an ni.

Lunglei CMO Dr Thani Pachuau chuan Press mite zawhna chhangin tun dinhmunah Lunglei District ah Swab sample 738 lak tawh niin tun dinhmunah result 434 hmuh let tawh a ni a, result 45 a positive tawh a, result nghah mek hi 304 a ni. Tin, Pondicherry, Tamil Nadu leh Goa atanga lo haw, Quarantine period zo tawh, swab sample la lak loh mi 67-te chu RT-PCR a test turin voinah hian koh khawm niin an swab sample lak a ni dawn bawk a ni. Tin, National Health Mission, Mizoram hmalaknaa Civil Hospital, Lunglei-a Covid-19 test na tur Molbio Truenat khawl pahnih pawh hman theih thuai tura hmalak a nih thu a tarlang bawk.