463/2023-2024

Lunglei the 16th May, 2023 – Vawiin khan Lunglei District Development Coordination and Monitoring Committee (DISHA) chu an Chairman Pu C. Lalrosanga, MP Lok Sabha kaihhruaiin an thukhawm. Lunglei District huamchhunga Sawrkar Laipui Scheme kalpui mekte dinhmun zirchian niin hmalak tul te ngaihtuah ho a ni.

Meeting ah hian Lunglei South bialtu MLA Dr K. Pachhunga, Lunglei District DISHA Member Secretary Pi Ramdinliani, Deputy Commissioner, Pu Donny Lalruatsanga, Project Director DRDA leh a kaihhnawih Sawrkar official-te bakah BSNL, IOCL, VC, YMA leh MHIP aiawh an tel a ni.

Chairman Pu C. Lalrosanga, MP chuan DISHA chu Central Government scheme pawimawh zawng zawng thlirhona leh zirchianna anih avangin ram hmasawnna atan a pawimawh hle a, sawrkar laipui hotute pawhin an ngai pawimawh takzet a ni, a ti a. Mizoram chu State dang te nena khaikhin pawhin Sawrkar Laipui Scheme kalpui kawngah kan thawk tha hle a ni tiin kan performance a that poh leh Sawrkar Laipui atangin sum kan dawn belh thei a ni tiin kalkhawmte chu uluk leh taima taka thawk chhunzawm turin a chah a ni.

Khawvel changkang chho zel ina a ken tel Information Technology lamah pawh hma kan sawn ve zel a tul hle a ni tiin DISHA Chairman Lok Sabha MP Pu C. Lalrosanga chuan hemi kawngah Department tin te hmasawn zel tura theihtawp chhuah theuh turin a chah a. Lunglei District Department hotute chu Scheme an implement naa harsatna hrang hrang an tawhte leh Central sawrkara thlen sak leh bawhzui tul te DISHA meeting-ah report hreh lo turin a chah bawk a ni.

Meeting ah hian Central sawrkar sum hmanga hmasawnna hnathawh hrang hrangte report pek ani a; a tlangpui chu hetiang hi a ni.

Kum 2022-2023 chhungin Lunglei District-ah MGNREGS job card holder te account ah cheng nuai 6591.33 thun a ni a. Lunglei District huamchhunga block pathum – Lunglei, Bunghmun leh Lungsen ah te 2022-23 chhungin ni 100 inhlawhna siam a ni. MGNREGS hnuaiah hna chi hrang hrang (drought proofing, land development, fisheries, minor irrigation, water harvesting etc) hna 2238 thawh zawh niin thawh mek 489 a awm a ni. Aadhaar seeding pawh zawh fel tep niin 99.62% zawh tawh a ni.

Amrit Sarovar hnuaiah Lunglei District Target 75 niin hei hi zawh fel tawh a ni.

Kum 2022-23 chhungin Mizoram State Rural Livelihoods Mission (MzSRLM) hnuaiah Lunglei District-ah Self Help Group 286 siam belh (Lunglei Block – 73, Bunghmun Block – 38 leh Lungsen Block - 175) hengte hi bank account hawn vek tawh a ni a.

Lunglei District chhunga PWD Division pathum - PWD Tlabung Division, PWD Lunglei Road Division I leh PWD Lunglei Road Division II hnuaia Pradhan Mantri Gram Sadak Yojana (PMGSY) kawng siam hna 30 awm zingah tun dinhmunah 13 zawhfel tawh niin hna 17 thawh leh mek a ni.

PHE hnuaiah Swachh Bharat Mission (Gramin) hnathawh te pawh en ho a ni a. BM (G) hnuaiah hian Lunglei District-ah thingtlang khua 134 a awm mekin Lunglei District in ODF Plus Village ala nei ve lo a. Hemi tur hian hmalak mek niin Block tinah Block Coordinator ruat niin ODF Plus Verification Team pawh din an ni.

Khawpuia mirethei te in sak tanpuina PMAY (U) hnuaiah1st Phase oh beneficiary 874 awmin 624 in an sa zo tawh a, 2nd phase ah beneficiary 637 hnenah 1st instalment pek fel an ni tawh. Tlabung ah beneficiary 592 thlan fel niin 584 in 1st installment dawng tawhin 170 in 2nd instalment an dawng fel tawh a ni. Swachh Bharat Mission (Urban) hnuaiah chhungkaw 1335 te ek in (Individual househoild latrine) sak tanpuina pek an ni tawh bawk a ni.

Kum upa pension IGNOAPS hnuaiah Lunglei Districtah beneficiary 5111 an awm mek a, widow pension scheme hnuaiah beneficiary 376 awm mekin, pianphung rualbanlo beneficiary 143 an awm mek bawk. Mid Day Meal hnuaiah school 438 atangin zirlai 22,951 beneficiary an awm mek a ni. ICDS hnuaiah Lunglei District ah Anganwadi 418 awm mekin beneficiary 17,346 an awm a ni. Kum 2022-23 chhungin PMEGP loan 76 (cheng nuai 666.40) pek chuah a ni.

Heng scheme te bakah hian National Health Mission, National Food Security Act (NFSA), PMAY( HFA), BADP etc chungchang te sawiho niin hmalaknaa harsatna tawh thin te, ruahmanna hmachhawp te leh thil dang pawimawh tam tak sawi ho a ni.