1437/2023-2024

Lunglei; the 9th August;2023: Vawiin chawhnu dar 1:00Pm khan DC Conference Hall-ah Lunglei District Disaster Management Authority (DDMA) member te leh sawmbik ten meeting an nei. Meeting hi Lunglei District DDMA Chairman leh bawrhsap ni bawk Pi Ramdinliani'n a kaihruai a. 33- Lunglei South AC bialtu MLA Dr.K. Pachhunga leh 34- Thorang AC bialtu MLA Pu Zodintluanga Ralte ten meeting hi an telpui ve a ni.

Vawiin Emergency meetingah hian kar kalta Friday atanga chawl lova ruahsur avanga Lunglei district chhunga harsatna thleng te sukiang tura district Administration hmalakna te thlir ho a ni a. Hmalak tawhna leh hmalak mek te,hmachhawp hrang hrang te bakah ruahsur zel tur atana Lunglei district DDMA inpuahchah dan sawi ho a ni. Concern official te atangin Buhfai,Power supply,Water Supply, Damdawi etc dinhmun te report ngaihthlaka ni a.Tlabunga tui lian avanga harsatna thleng te sutkian dan tur sawi ho a ni bawk. Leimin avanga NH-54 leh NH-302 ping thin sutkian dan turte sawi ho a ni.

Lunglei South AC bialtu MLA Dr.K.Pachhunga chuan Ruahsur nasat avanga NH- 54 a block laia khualzin tang mi 200 chuang a bialchhung khua Thualthu leh TawipuiNorth I YMA Branch khaw mipui ten ei leh in tur an lo buatsaih sak chu lawmawm a tih thu sawiin, District Administration pawhin rang taka ruahsur avanga harsatna thlengte sukiang tura ke a penchhuah thin avangin lawmthu a sawi a, a bialchhung dinhmun meeting kalkhawm te hnenah report tawi a pe bawk.

Thorang bialtu MLA Pu Zodintluanga Ralte pawhin thu sawiin, hun reilo te chhunga District Administration lamin ruahsur avanga Lunglei district chhunga chhiatna thleng chungchanga detail report an buatsaih thei hian an theitawp an chhuah tih a pholang a, an thlamuanpuiawm tak zet a ni, a ti. Pu Zodintluanga chuan chhiatna tawk miah lo ten zangnadawmna an dawng tih thawm te a awm thin a, sawi leh sel a tam thin. Chuvangin Official te chu spot verification an neih lai leh damage assessment an siam lai atangin, chhiat tawkte ngeiin tanpuina an dawn theih nan fimkhur taka kalpui turin a ngen hlawm a ni.

Vawiin meeting-a ruahsur nasat avanga tahrik ni 06/08/2023-08/08/2023 inkara Lunglei district a chhiatna thleng report te chu:
1) Leimin---35
2) Road block leh thenfai tawh---7
3) Lei khi leh tlahniam---7
4) Retaining Wall chim---3
5) Quarry chim---1
6) Kawng chhia---1(Bualte)
7) Tui lianin khaw 11 a Effect.
(a) Tlabung khuaah chhungkaw 438 thiarchhuah an ni.
(b) khawmawi khuaah chhungkaw 6 thiarchhuah an ni.
(c) Undermanik khuaah chhungkaw 8 thiarchhuah an ni.

Vawiin meetingah hian Assam Rifles,2nd Bn MAP leh BSF te inpuahchahna pawh report ngaihthlak a ni. YMA aiawh atang pawhin a tul hun apianga sawrkar pui turin an inpeih thu ngaihthlak a ni bawk.ț

Pi Ramdinliani chuan dept. tin ten theitawp chhuaha an inpuahchahna-ah lawmthu sawiin, sawrkarin tih tur leh tih loh tur a tih te chu mipui ten zawm hram hram turin a chah hlawm bawk a ni.