3666/2022-2023
Lunglei the 23rd February, 2023 - Lunglei District Disaster Management Authority chu vawiin khan an Chairman Lunglei DC Pi Ramdinliani kahhruaiin a office chamber-ah an thukhawm.

Fur ruahtui ina chhiatna a thlen theih hrang hrang te laka lo inpuahchah lawk dan tur te leh Veng VC thenkhat atanga disaster kaihhnawih hmalak tul report dawn te bawhzui dan tur te meeting-ah hian rel ho a ni.

Buhfai monsoon stock chungchanga hmalaknate Lunglei DCSO Pi Carolyn LB Khiangte atanga ngaihthlak a ni a. Lunglei PDC atangin centre pasarih – Chawngte, Tlabung, Lungsen, Tuichawng, Putlungasih, Borapansury leh S. Vanlaiphai ah te buhfai monsoon stock pe chhuak turin release order tihchhuah tawh niin buhfai te hi thawn chhuah mek tawh a ni a. Borapansury atan hian thla 8 stock, Lungsen atan thla 4 stock leh a dang zawng tan thla 6 stock pe chhuak tura ruahman a ni a, April thla chhunga pek zawh fel tum a ni.

Chhiatna laka invenna kawngah leh chhiatna a thlenin a veng/khua mipui leh khawtlang hruaitute an pawimawh takzet thu meeting ah hian tarlan niin Lunglei District huamchhunga khua leh veng tinah te Village Disaster Management Committee (VDMC) mumal taka kalpui ni se tih meeting chuan a rel a. Hemi chungchangah hian khua leh veng tinah te lehkha thawnin VDMC mawhphurna te leh chetlak dan tur te hriattir ni se tih meeting chuan a rel a. VDMC –te hi a tul apiangah District Disaster Management Authority in hma a lak pui zel dawn a ni.

Lunglei khawpui chhung, NH-54, NH-302 leh kawngpui dangah te fura leimin hlauhawm a awm em tih enfiah lawk ni se tih meeting chuan a rel bawk a. Veng leh khaw tin VDMC te chuan heng a awm leh awmloh DDMA ah report thehlut tura hriattir ni se tih rel niin NH-54, leh NH-302 ah te NHIDCL report pe tura hriattir an ni dawn a. Chairman DDMA ho hian February ni 28-ah NHIDCL nena meeting neih tum a ni.

Phairuangkai Lei thawm that leh a tul em tih leh a hmuna duty-te in dah a ni em tih chungchang pawh sawiho a ni a. He Lei ah hian SRK Constructions ten duty an dah mek thu report ngaihthlak a ni.

Tlabung tui lian thin chungchang pawh sawiho niin Tlabung SDO(C) atanga Disaster Plan beisei anih thu pawh meeting-ah hian tarlan a ni.

VCP Lunglawn atanga report dawn, PHE water Tanky chungchang ngaihtuah ho niin he tanky hi a hmunah Lunglei SDc i/c Pu Lalramenga hovin inspection neih ni se tih rel a ni a.

BPCL Petrol Pump, Zotlang chungchang zirchiang turin expert team din ni se tih meeting chuan a rel bawk a ni.