No.787/2020-2021

Nimin khan Lunglei District Task Force on Covid-19 chu an Chairman Lunglei DC Pu V.Lalsangliana hovin Lunglei DC Conference Hall-ah an thukhawm a, 04.05.2020-17.05.2020 chhunga Lockdown kalpui dan tur Mizoram sawrkar thuchhuak (dated 2nd May, 2020) Lockdown 3.0 inkaihhruaina dan May ni 4, 2020 atanga hman tan tur chu zir hovin Lunglei District huamchhunga inkaihhruaina an duang.

Lunglei District Task Force on Covid-19 Chairman Lunglei DC Pu V.Lalsangliana chuan DLTF member-te, Village Level Task Force-te, Covid-19 frontline workers-te, NGO, VC, media-te leh phal taka tanpuina thawhtu mimal, pawl, Kohhran  bakah  PPE, mask leh sanitizer siamtu mi thahnemngai tak takte thawhhona leh inpekna zarah Covid-19 hrileng do hna chu Lunglei District-ah tluang taka kalpui mek a nih thu tarlangin Lockdown 3.0 pawh hlawhtling taka kalpui anih theih na turin mawhphurhna neitute leh District mipuite thlawpna leh tawiawmna a ngen a ni. 

Lunglei District Task Force on Covid-19 Chairman chuan a hnuaia tarlan ang hian 04.05.2020-17.05.2020 inkara Lunglei District chhunga Lockdown kalpui dan tur hriattirna a ti chhuak:

A. BUNGRAW CHAWKLUH LEH THIAR CHUNGCHANG

1. State pawn atanga bungraw lakluh theih zingah nitin mamawh (essential commodities) te chu phalna hranpa lak ngai lovin lak luh theih a ni ang. Amaherawhchu, mCOVID-19 mobile application-a mPass hmangin declaration an thehlut ngei ngei tur a ni.

2. Nitin mamawh ni lo (non-essential commodities) bungraw dang la lut tur te erawh chuan mCOVID-19 mobile application-a mPass hmangin Home Department phalna an la hmasa tur ani.

3. Mizoram chhung bika (District dang ami leh District chhunga khawdang ami) bungraw phurh leh thiar te tan phalna hranpa lak a ngai lovang a, VLTF hriatpuina erawh chu an nei tur a ni.

B. DAWR LEH SUMDAWNNA HMUN

1. Khawpui chhung bikah, hmun lunlai/dawrkawna dawr inthenawm te chu nikhat kar danah an in hawn chhawk ang.

2. A ni zawnin dawr pakhat in hawn phal a ni lo. 

3. Dawr inthenawm te nikhatah a rualin in hawn phal a ni lo. 

4. A chunga dawr inhawn dan ruahmanna hian  mihring leh ran damdawi dawr leh clinic-te a huam lovang. 

            Dawr inhawn dan turah hian Incident Commander, District Level Task Force leh dawr awmna veng VLTF-ten ruahmanna an siam ang.

5. Mipui mimir-in awlsam taka thlai leh chawhmeh an hmuh theih nan veng hrang hrangah VLTF ten chawhmeh zawrhna tur an ruahman ang.

6. Thlai, thei leh sa zawrhna VLTF-ten an ruahmanna ah mipui an inhnaihchilh loh nan mipui dinna tur feet ruk danah an rin tur a ni.

7. A tul angin bazar hmun bik kher nilo school kawt zawl, inkhelhna field tual leh hmun remchang te pawh a tul anga ruahmanna siam a ni ang.

8. Chawhmeh, thlai leh theite, in lama pek (home delivery) phal a ni. Tuallai leh kawtthlera thil zawrh (street vending) khap tlat a ni.

9. Hotel ah Mizoram-a khualzin cham mek te thlen phal a ni a. Mikhualte tana ei leh in buatsaih pawh phal a ni. Amaherawhchu, pawn lam mi (hotel-a thleng mikhual ni lo) te an dawngsawng tur a ni lo.

10. Restaurant hawn phal a ni lova, home delivery erawh phal a ni ang. Public park, picnic spot, movie theatre, gym, spa, beauty parlour, community hall, bazarpui, shopping complex, mall leh intawllenna hmun zawng zawng chu khar chhunzawm tur a ni.

10. Dawr zawng zawng (damdawi dawr tiam lovin) chu zing dar 7 leh tlai dar 3:00 inkarah chauh inhawn theih a ni.

C. DAWR LEH SUMDAWNNA HMUNA DAWR NEITU LEH MIPUITE ZAWM TUR

1. Bazar, dawr leh hmun danga kal tur reng reng chuan (face mask leh hmanraw dangin) hmai an tuam ngei ngei tur a ni.

2. Mi 3 aia tamin dawr pakhat an nghak tur a ni lo.

3. Dawr nghaktu ten face mask an hmang reng tur a ni. Faina, a bik takin kut sil fai an uar tur a ni.

4. Dawr neituten (dawrtu te inhlat taka an awm theihnan) dawrtu turte dinna tur, feet ruk kar danah an rin lawk tur a ni. Dawr chhungah pawh feet ruka inhlatin an awm tur a ni. Hei hian inentirna (clinic) pawh a huam ang.

5. Thlai leh chawhmeh dang zuar ten an thil zawrh te fai takin an enkawl tur a ni a, thil zuar reng rengin hmai an tuam ngei tur a ni.

D.  ZIRNA IN, SAKHAW BIAKNA HMUN LEH MIPUI PUNKHAWMNA HMUN TE

1. Zirna in, training institute leh sakhaw biakna hmunte chu khar chhunzawm zel a ni ang. Amaherawhchu, hei hian an administrative office hna pangngai kalpui erawh a huam lovang.

2. Mipui punkhawmna, heng - inneih lawmna (reception), lungphun, anniversary leh birthday lawmna, games & sports, book release, politics leh pawl thila kalkhawmna, intihhlimna ang chi reng reng - te chu he hun chhung hian huaihawt phal a ni lo.

3. Inneih inkhawm leh mitthi vuina-ah mi 20 aia tam punkhawm khap a ni.

E. ZIN VEIVAH LEH MIPUI CHET VEL CHUNGCHANG   

1. Tul bik thila phalna pekte tan lo chuan Inter-State a zin leh veivah khap tlat a ni. 

2. Tul bik thil heng - chhiat tawh, damloh leh eizawnna thil pawimawh bik – a nih loh chuan zin veivah loh tur a ni. Chhiat tawh leh damloh thila District pawna chhuah ngaite chuan anmahni chenna VLTF phalna an la hmasa tur a ni. Thil dang tulna avanga District chhunga zin chhuah ngaite chuan mahni chenna VLTF atangin phalna an la tur a ni.

3. Chhiat tawh leh damloh thil ni lova District chhuahsan ngaite chuan Deputy Commissioner hnenah online (mCOVID-19 App) hmangin phalna an la hmasa tur a ni.

4.  Mizoram chhunga zin veivak te hi COVID-19 symptom nei emaw COVID-19 vei nena contact history nei an nih loh chuan quarantine an ngai lovang.

F. LIRTHEI TLANCHHUAH DAN

1. Mizoram chhung khaw kar kawnga passenger phur lirthei (commercial passenger vehicle) te tlan phalsak an ni ang. Heng lirtheite hi registration number ‘odd-even’ angin an intlanchhawk ang. Odd number (1,3,5,7,9 a tawp te) lirtheite chu Thawhtanni, Nilaini leh Zirtawpni ah an tlan ang a. Even number (0,2,4,6,8 a tawp te) lirtheite chu Thawhlehni, Ningani leh Inrinni ah an tlan thung ang. Sunday-ah chuan tlan phal a ni lovang. Passenger thut theih zat (seating capacity) atanga 50% chauh an phur thei ang.

2. Khawchhunga service bus, taxi, leh auto rickshaw te chu a chunga tarlan ang khian ‘odd-even’ angin nitin an in tlanchhawk ang. Passenger thut theih zat atanga 50% chauh an phur thei ang. Tin, heng lirthei (commercial passenger vehicle) a chuang te hian mask/hmai tuamna an vuah vek tur a ni. Passenger te hman tur hand sanitizer an pai reng tur a ni.

3. Tul bik thila private motor tlante pawh 'odd-even' angin a chunga tarlan ang khian an tlan ang. 

4. Intlanchhawk hian duty nana sawrkar hnathawkte motor, VLTF duty te lirthei, ambulance leh medical emergency a hman motor te, print & electronic media mi te motor, bawlhlawh paih motor, bawnghnute phurh/ sem na motor te a huam lovang.

G. MIPUI VANTLANG TANA INKHUAHKHIRHNA HRIATTURTE

1. Hemi hunchhung hian mi 5 (panga) aia tam punkhawm khap tlat a ni.

2. Tul bik thilah lo chuan tumahin mahni in leh compound an chhuahsan tur ani lova, mahni in chhuahsan leh veng danga kal ngai te chuan mahni chenna VLTF phalna an la tur a ni.

3. Tlai dar 7:00 leh zing dar 4:00 inkarah pawn chhuah khap tlat a ni. Hemi atana Deputy Commissioner in Section 144 CrPC, 1973 tlawhchhana inkhuahkhirhna thupek an chhuah chuan COVID-19 chungchanga duty te leh Deputy Commissioner-in phalna a pek te a huam lovang.

4. Loh theih loh thil anih loh chuan, kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te chu mahni inchhungah inkharkhip tur a ni.

5. Pawn chhuak tur leh damdawiin a kal tur reng reng chuan (face mask emaw hmanraw dang hmangin) hmai an tuam ngei tur a ni. 

6. Vantlang hmun leh dawr a kal te chu feet ruk tala inhlata awm tur a ni.

7. Ram pawn atanga lo lut mikhualte tumahin thlen (mikhual) phal a ni lo.

H. HMALAKNA DANG CHUNGCHANG

Hmasawn nana hmalakna leh mimal eizawnna chu phalna hranpa lak ngai lovin kalpui theih a ni. Amaherawhchu, ram chhunga awmsa labour te chauh ruaia thawh tur a ni. Hnathawktu ten ‘SOP on Social Distancing’ zawm chungin hna an thawk tur a ni. 

I. HREMNA DAN

He thupek zawm lo chu Disaster Management Act, 2005, section 51 atanga section 60, The Mizoram (Containment & Prevention of COVID-19) Ordinance, 2020 leh IPC section 188 hmangin hrem theih an ni.

He hriattirna-a tarlan loh te chu State Sorkarin thupek a chhuah zawng zawngte zawm vek tur a ni.