Vawiin khan Lunglei Circuit House Conference Hall-ah Education Parliamentary Secretary Pu Joseph Lalhimpuia hovin Lunglei District Education Committee for RMSA & SSA neih a ni a. He meeting hi Lunglei DC Pu Ashish Madhaorao More-in a kaihruai a ni.

Parliamentary Secretary Pu Joseph Lalhimpuia chuan sorkar-in District Education Committee meeting leh Review meeting neih zin hi thil tulah a ngaih thu leh kum khatah vawi khat tal Education Minister emaw Parliamentary Secretary emaw hovin he meeting hi thukhawm tura beisei an ni nghe nghe a ni tih a sawi a. Education puala sum sanction hi engzatnge ni a, a kalna turah a kal em tih leh a dawngtu ten an hmang dik em tih hi Committee chuan a vil reng tur a ni a; sum dawn tam hi ropuina a ni lova, sum hmuh ang ang hi hman that hi a pawimawh zawk a ni, a ti. Kumin atangin RMSA leh SSA hnuaia sum hi State Plan hnuaiah dah a nih tawh avangin kar hnih-khat maia tihfel theih thin chu hun a duh rei deuh tawh avangin sum pawh a hmuh hma theih loh a ni, a ti.

Parliamentary Secretary Pu Joseph Lalhimpuia chuan thu a sawi zelnaah sorkarin state pumah ‘Literacy Drive’ nasa zawka kalpui a tum thu leh Pre-Primary School 148 din tum a nih thu a sawi a; hei hian drop-out rate a tihniam ngei tur leh ziak leh chhiar thiam zat pawh a tihsan phah ngei tura beisei a ni, a ti. School hrang hranga ‘Physical Wing’ tih chak leh zirlai tithate tan ‘Incentive Cash Award’ pek lamah pawh tan lak chho zel tum a ni a; nakkum atangin HSLC Topper leh HSSLC Stream hrang hranga Topper te hnenah sorkarin Rs.50,000/- theuh pek tum a ni, a ti a. Pu Joseph Lalhimpuia chuan Zirna tihhmasawn nan Education Department emaw RMSA leh SSA emaw chauh hi mawhphurtu an ni lova, Lunglei District mipui zawng zawngte tanhona chuan zirna lama kan dinhmun a chawisang zawk dawn a ni, a ti.

Vawiina meeting-ah hian Lunglei DEO Pu R. Lalthakima bakah Education Department leh RMSA & SSA officials leh hnathawkte an tel kim hle a. Kum 2014-2015 Annual Work Plan & Budget for RMSA & SSA chu vawiin meeting-ah hian en ho nghal a ni.