4049/2024-2025

Lunglei, 2025 Pawlkut thla ni 31: Lunglei District Election Officer Pi Navneet Mann chuan January ni 30, 2025 khan hriattirna chhuahin, State Election Commission (SEC)-in Village Council leh Local Council inthlan a puan tak avanga Notification No.B.14015/1/2025-SEC/LC/23 dated 16.01.2025 hmanga sawrkar hna thawkte zawm tur a tihchhuah, a hnuaia tar lante hi Lunglei District huam chhunga sawrkar hna thawkte'n zawm ṭheuh turin a hriattir.

Inthlanpui vuakveta sawrkar hna thawkte zawm tur:

1. Sawrkar hna thawk chuan inthlanpui lo awm turah hian pawl leh mimal duhsak bik eng lai mahin a nei tur a ni lo va, hleih nei lovin a awm reng tur a ni. Tin, party tan emaw, mimal inthlan chuh tum (candidate) tan emaw a campaign ve thiang lo bawk.

2. Sawrkar hna thawk chuan inthlan chuh tum (candidate) tu tan mah eng hawi zawng pawhin ṭanpuina leh puihna a pe chhuak tur a ni lo.

3. Sawrkar hna thawk chuan inthlan vuakvetah party/mimal candidate tan anmahni duhsak zawnga thu sawi te, langsar taka party thila inhnamhawih te leh a kul a taia lo ṭan ve te a tumin, a ti tur a ni lo.

4. Sawrkar hna thawk chuan inthlan kaihhnawihah minister emaw, political party mi leh sa emaw a lo ṭawiawmin, a lo puibawm tur a ni lo.

5. Sawrkar hna thawk chu inthlan kaihhnawiha political party buatsaih inhmuh khawmna (political meeting) reng rengah dan leh thupek kengkawh tura ruat a nih ngawt loh chuan a tel ve tur a ni lo.

6. Sawrkar hna thawk chuan ni tina bawhzui ngai pisa thil leh sawrkar hotute aṭanga thu chhuak (official transaction) buaipui kawngah political party duhsak bik a nei thiang lo va, eng lai pawhin thu lai la takin a awm reng tur a ni. Political party emaw, inthlan chuh tumte emaw, anmahni thawhpuite'n thu buai hla buai (registered case) an theh luh chuan police hotute'n rang takin, ṭan bik leh awn bik nei hauh lovin, dik leh fel takin an bawhzui tur a ni.

7. Sawrkar hna thawkin inthlan puala thu zawm tur (code of conduct) a bawhchhiat chuan hremna hmachhawn turin amah leh amah a inbat buai tihna a ni a, Central Civil Services (Classification, Control and Appeal) Rules, 1985 angin a chungah hremna lek kawh a ni ang.