Vawiin chawhma dar 11:00 khan DC Conference Hall-ah Lunglei Additional DC Pu Benjamin Lalzama chuan Assembly Constituency pasarih awmna Lunglei District Final Electoral Roll 2018 a tlangzarh. Vawiin tlangzarhna programme-ah hian election lam kaihhnawih sawrkar official-te bakah Political Party hruaitute leh MJA hruaitute an tel. 

Pu Benjamin Lalzama chuan Lunglei District Final Electoral Roll a hun taka peih fel a ni chu lawmawm a tih thu sawiin Election Branch-a thawktute leh ERO, AERO, BLO te thahnemngaihna leh thawhrimna chu fakawm a tih thu a sawi. Lunglei District-in Electoral Roll  dik leh felfai tak a neih theih nan Special Summary Revision hun chhungin nasa takin hmalak a nih thu sawiin August thla chhungin ‘Special Drive of E-Roll’ neih a nih bakah District huamchhunga ERO, AERO leh BLO-te tan vawi engemawzat training buatsaih a ni a, November thla chhung khan Special Drive buatsaih a ni bawk. 

Final Electoral Roll in a tarlan dan in Lunglei District-ah voter 1,03,577 (mipa – 51635, hmeichhia - 51942) an awm a, Assembly Constituency hrang hrang dinhmun chu hetiang hi a ni:

1.       Draft Roll hnuhnung berah Mipa – 50,792 leh hmechhia - 57,032 awmin 1,01,824 voters an awm.

2.       Special Summary Revision atanga pun belhna ( Mipa  - 843 leh hmeichhia – 910 )= 1753 voters.

3.       Final Electoral Roll-a District pumpuia vote nei zat (Mipa – 51635 leh hmeichhia - 51942) = 1,03,577 Voters.

4.       Punna % = 1.72%

5.       Mipa aiin hmeichhia hi 307 in an tam zawk a ni.

6.       Lunglei District A/C zinga voter tamna ber chu Lunglei South A/C niin voters 16,937 an awm a, voter tlem na ber chu Thorang A/C niin voters 12,811 an awm a ni.

7.       Za zela punna sang ber A/C = 29 – South Tuipui (ST) = 2.36%

8.       Za zela punna tlem ber A/C = 34 – Thorang (ST) = (-)0.17%

9.       Service Voter hnuaiah Form 704 dawn niin 324 chu pawm an ni. 

Special Summary Revision of Photo Elec­toral Rolls, 2018 ah hian Qualifying date-ah 01.01.2018 hman a ni. Election Commission of India-in ruahmanna a siam angin, Final Electoral Rolls hi Recognized National Party leh State Political Party te hnenah a thlawnin hard copy pakhat leh soft copy pakhat pek an ni.