Mizoram State Elections 2013 atana Lunglei District Assembly Constituency 7 vil tura ruat General Observers-te chu an vaiin Lunglei an lo thleng kim tawh a. Nimin tlai dar 3:00 khan Lunglei Circuit House Conference Hall-ah election kaihhnawih officials te nen thukhawmin inthlan atana ruahmanna hrang hrang siam tawh leh kalpui mek dan te an sawiho a ni.

Lunglei DC/DEO Pu V.Sapchhunga kaihhruai he meeting-ah hian General Observers ten inthlan chungchanga an ngaih pawimawh thil thenkhatte chu officials kalkhawmte an hrilh bakah harsatna awm a nih chuan sawihova chinfel vat zel an duh thu an hrilh a. Inthlanna felfai leh muanawm tak a awm theih nana nitin an hnenah report thehluh tur chungchangah officials te chu taima leh rinawm taka an duty ti theuh turin an fuih a ni. DEO Pu V.Sapchhunga chuan Lunglei Distrcit huamchhunga election kaihhnawih thil hriattur pawimawh hrang hrang Observer-te a hrilh a. Lunglei SP Dr.V.J.Chandran pawhin inthlan chhunga security lampang ruahmanna an siamfel tawh thu leh dan leh thupek kenkawh kawngah Police lam pawh an inpeih vek tawh thu Observers-te a hrilh bawk a ni.

General Obervers-te hnena inthlan atana Lunglei District chanchin tarlan thenkhat chu a hnuai mi ang hi a ni : 1)Total No. of Electors : 94283 (Mipa 47157, Hmeichhia 47126) ;  2)Polling Stations awm zat : 175 (South Tuipui 24, Lunglei North 25, Lunglei East 17, Lunglei West 21, Lunglei South 33, Thorang 33 leh West Tuipui 22) ;  3)Polling Station 1 chauh awmna hmun 142 a awm a, Polling Station 2 chauh awmna hmun 9 leh Polling Station 2 aia tam awmna hmun 5 a awm a ni ;  4)Mizoram MLA inthlan 2008 khan voter turn-out chu 81.75% a ni a, MP Election 2009 khan voter turn-out chu 54.24% a ni thung.

Lunglei District chhunga Assembly Constituency hrang hrang General Observers atana ruat te chu : Pu Dipinder Singh, IAS - (29)South Tuipui leh (31)Lunglei East ;  Pu Julius Lakra, IAS - (30)Lunglei North ; Pu P.K. Verma, IFS - (32)Lunglei West  ; Pu Vevekanand Jha, IFS - (33) Lunglei South ; Pu Debi Prasad, IAS - (34) Thorang  ; Pu B.D.Parkhe, IFS - (35)West Tuipui.