2639/2025-2026

Lunglei, 2025 Pawltlak thla ni 12: Lunglei District-in Project LEAP (Lunglei’s Empowerment for Access and Equity for all Persons) hma lakna kal tlanga vohbikte tana remchanna leh awlsamna tura hma lakna, Accessible India Campaign (Sugamya Bharat Abhiyan) kalpuina kawnga a thawh ṭhat avanga kumin December ni 3-a "National Award 2025 for Most Outstanding District in Implementation of Accessible India Campaign" a dawn lawm nan leh thawktute ngaihhlutna lantir nan vawiin khan Lunglei District Bawrhsap hna thawh pindanah ṭhut khawm a ni.

Lunglei District Bawrhsap (Deputy Commissioner) Pi Navneet Mann chuan ṭhut khawm hi kaihruaiin, Lunglei District-in National Award a dawn chu hma latu hrang hrangte thawh hona leh ṭan rualna rah a nih thu a sawi a. Project LEAP kalpuina kawnga tha thawhtu department hrang hrang - Social Welfare, Health & Family Welfare, Block Development Officer-te, Information & Public Relations leh DC office-a officer leh staff-te bakah, anmahni thawhpuitu local/village council leh tlawmngai pawlte chungah lawm thu a sawi a. Project LEAP kal tlanga Lunglei District-a vohbikte chawi kanna kawngah rah duhawm zawk hmuh zel a beisei thu a sawi.

BDO-te leh department hrang hrang ai awhte atangin Lunglei District-in National Award a dawng chu lawmawm leh hlu an tih thu ngaihthlak niin, thawh hona ṭha tak nena hma lak chhunzawm zel dan tur rawtnate sawi ho a ni a. Kum thar lamah ngawrh leh huam kim zawka vohbikte dinhmun zir chianna kalpui bakah, vohbikte hriselna en dikna (health assessment camp) tam zawk buatsaih chhunzawm te rawt a ni a. Access Audit kal tlanga vantlang hmunhmaa vohbikte awlsam zawka an lawi luh theih nana sawrkara hma lakna tur rawtna theh luhte chu chak zawka um zui ni se, tih a ni bawk.

Project LEAP hi Lunglei District Bawrhsap kaihhruaina hnuaia Lunglei District-a vohbikte chawi kanna tur ruahmanna niin, vohbikte'n ram leh khawtlanga an chanvo an hmuh theihna tur leh vohbikte huap zo hma lakna a awm theih nana inzirtirna leh hma lakna a ni a. He hma lakna hi India ram pum huap pawha hma lakna chhuanawm leh entawn tlak tak pakhat a nih avangin National Award 2025 hi hlan a ni.

Project LEAP hnuaiah hian kumin 2025 January - March inkar chhung khan District chhung khaw hrang hrangah in tina kal chilhin vohbikte dinhmun zir chianna (disability survey) kalpui niin, vohbik 1,400 chuang chhinchhiah an ni a. Hmun hrang hrangah vohbikte hriselna dinhmun endikna (health assessment camp) buatsaih niin, vohbik mi 1,091 te'n an chhawr ṭangkai a; hemi kal tlang hian Unique Disability Identity (UDID) Card thar eng emaw zat siam a nih bakah, ṭanpuina hmanraw hrang hrang dilsak an ni a. June 2025 khan ALIMCO nen ṭang kawpin vohbikte ṭanpuina hmanraw chi hrang hrang cheng nuai 52 hu chu ni khat thil thu-ah mi 740 hnenah sem chhuah a ni bawk.

He'ng bakah hian vohbikte awlsam taka vantlang hmun pawimawha an lawi luh theihna tur leh service hrang hrang an hman theihna tura ruahmanna a awm theih nan access audit buatsaih niin, vohbikte tana pan remchang turin inthlanna hmunhmate ruahman a ni a. Hlawhtling takin vohbikte kut - Purple Fair buatsaih a ni bawk.