3067/2022-2023

Lunglei the 15th December, 2022 – Vawiin khan Lunglei West bialtu MLA & Agiculture, Cooperation etc changtu Minister Pu C. Lalrinsanga hovin Lunglei District huamchhunga ATL Road thawm that mek leh Lunglei khawpui chhung kawng siam mek dinhmun leh hmalak tulte sawihovin Lunglei DC Conference Hall-ah meeting neih a ni.

Meeting-ah hian Lunglei HPC Vice Chairman Pu Lawmawma Tochhawng leh a kaihhnawih sawrkar official-te bakah Lunglei MJA, Sub Hqrs YMA, Lunglei Thalai Pawl leh Lunglei khawpui chhung kawng siam hna thawktu EL&TY Entreprise te an tel a ni.

Pu C. Lalrinsanga chuan Lunglei District chhung inkalphawna kawng siam that hna kal mek chu sawrkarin a ngaih pawimawh takzet thu sawiin PWD changtu Chief Minister Pu Zoramthanga hovin hmalak zel dan tur kawngah ruahmanna an siam mek thu a sawi a. Kawng siam mai piah lamah Lunglei khawpui chhungah tui chhe paihna (drainage system) tha zawk kan neih theihnan UD&PA Department kaltlanga hmalak theih dan tur pawh ngaihtuah mek anih thu a sawi a. PWD hotute leh contractor te chu working season hmang tangkaia chak taka hna thawk chho tura chahin harsatna an neihte a hnena theln thuai thin turin a chah a ni. Lunglei khawpui chhung kawng resurfacing hna thawk mek tu EL&TY Enterprise te tha taka an thawh avangin an chungah lawmthu a sawi a. He hna tha taka viltu Lunglei Police, a bik takin Traffic Branch te chungah lawmthu a sawi bawk.

Lunglei HPC Vice Chairman Pu Lawmawma Tochhawng chuan Aizawl-Thenzawl-Lunglei (ATL) World Bank kawng 100Km-160Km (Kanghmun – Lunglei) leh Lunglei khawpui chhung kawng thawm that hna kal mek piah lamah Pialthleng kawng leh Khawiva kawng te pawh Special Assistance to States for Capital Investment (SASCI) kaltlanga siam that theih dan tur ngaihven mek anih thu a sawi. Lunglei District huamchhugna kawng siam that chungchangah District mipuite thahnemngaihna a lawmawm a tih thu sawiin kawng siam uluk taka lo vilpui thin tu YMA, Lunglei Thalai Pawl leh Lunglei mipuite chungah lawmthu a sawi a ni.

PWD Lunglei Road Division EE Er Pazawna chuan Lunglei District huamchhunga kawng siam mek chungchangah report a pe a. Aizawl-Thenzawl-Lunglei (ATL) World Bank kawng 100Km - 160Km (Kanghmun – Lunglei) kawng siam thawktu Bhavya Construction-te Defect liability period hi 31.3.2023 thleng anih thu leh repair ngai te an thawh that loh avangin PWD hotute, Lunglei DC, YMA te nen pawh vawi engemawzat meeting leh inspection neih a ni a. Repair hna hi an thawh thaloh avangin Departmental a hnathawh tak niin hemi hna atan hian Bhavya Construction-te Security Deposit cheng vaibelchhe 1.93 leh performance security cheng nuai 74.69 chu hman chhoh mek a ni a. Kawng repair tur hi 2.2 kms vel a thui niin pothole hnawh hna za zela sawmnga zawh tawh niin Jharkhand atangin hnathawktu tur chah belh mek niin working season chhunga thawh zawh tum a ni. Aizawl-Thenzawl-Lunglei (ATL) World Bank Road chu motor tlan an tam em avangin a structure siam that a, tih chak a ngaih thu a report bawk a. Mizoram Road Fund Board hmalaknain uluk taka survey neih niin design thar tur atan hian Detailed Project Report (DPR) thar buatsaih anih tur thu a sawi. Lunglei khawpui chhung resurfacing hna Kikawn to AOC (160-164) chu PWD Class I contractor Pu PC Lalthantluanga (EL&TY Enterprise) in tha taka a thawh mek thu leh tun dinhmunah a zatve aia tam thawh zawh anih tawh thu a report bawk.

Pu PC Lalthantluanga (EL&TY Enterprise) pawhin an hnathawh dan tlangpui report in June ni 28-a work order tih chhuah anih atangin theihtawpa hmalak anih thu leh khawpui chhunga tui chhe paihna (drainage system) ruahman mumal awmloh avang te, PHE pipe hlui tawh leak nasat avang te leh raw material lakkhawm chungchangah chatlak a awm zeuh zeuh avangin hnathawh a hautak thu a report a. He hnathawh kawnga theihtawp chhuah pui tu Lunglei District MLA-te, official, YMA leh mipuite chungah lawmthu a sawi bawk.

Meeting neih zawh hnu hian Lunglei khawpui chhung kawng siam that hna te a hmunah kalin Minister Pu C. Lalrinsanga leh Lunglei HPC Vice Chairman Pu Lawmawma Tochhawng hovin site visit neih a ni.