Lunglei District Level Coordination Committee (DLCC) on African Swine Fever and other Trans-boundary Animal Disease (TADS) chu a vawikhatna atan nimin chawhnu khan an Chairman Lunglei DC Pu V. Lalsangliana office chamber-ah an thukhawm. Mizoram thenawm state Assam, Arunachal Pradesh, Meghalaya-a vawk natna hrik hlauhawm tak leng mek African Swine Fever (ASF) laka inven dan tur leh hmalak dan tur an sawiho. Meeting-ah hian a kaihhnawih sawrkar official-te, NGO leh vawk vulh association-te an tel a ni.

African Swine Fever (ASF) hi Kenya ramah kum 1921 khan hmuhchhuah niin India ramah chuan January, 2020 khan Assam leh Arunachal Pradesh State-ah te hmuhchhuah hmasak ber a ni a; kumin August thla khan Meghalaya State ah hmuhchhuah leh a ni. ASF hi virus vanga thleng, vawk lam chi te tana natna inkaichhawn awlsam tak leh hlauhawm tak, a kai tawh za a za thihna thlentu a ni. Kan ram thenawm Myanmar-ah pawh he natna hrik hi hmuhchhuah leh finfiah a ni tawh a, tun chinah a hri danna (vaccine) leh a enkawlna tur bik damdawi ala awmlo a ni. 

 DLCC Chairman Pu V.Lalsangliana chuan he natna hrik hlauhawm tak laka inveng turin Department hrang hrang, NGO-te, khawtlang hruaitute leh vawk vulhtu leh vawk hmanga eizawngte kan tan tlan vek a tul a ni tiin Committee member-te chu theihtawp chhuah theuh tur leh a tul anga inpuitawn turin a chah a ni. 

Lunglei District-a international border awmna Tlabung ah SDO Civil Chairman-na hnuaiah Sub-Division level committee din ni se tih Committee chuan a rel a. He natna hrik chungchang mipuite zirtirna ‘Awareness Campaign’ pawh uar taka kalpui nghal tum niin Lunglei leh Hnahthial District huamchhunga khaw 48-ah Campaign hi kalpui tum a ni a, vawk vulhtu, vawk talh, vawksa zuar, NGO leh mipui tam thei ang ber hnenah Awareness Campaign hi neih a ni ang. Vawk tawlh ruk man, vawk damlo emaw vawk thi an awm anih chuan ‘National Action Plan for Control Containment and Eradication of African Swine Fever’ dungzuiin hmalak ngei tur ani tih DLCC ah hian tarlan niin Nodal Department AH&Vety chu mawhphurna pek an ni a, vawk tawlh ruk man leh vawk damlote dah hranna tur Isolation/Quarantine Facility pawh lo ruahman fel nghal turin DLCC Chairman chuan Nodal Department AH&Vety chu a hriattir a ni. 

 Lunglei District Rapid Response Team pawh din nghal niin he team hi District hmun hrang hrangah feh chhuakin zirchianna physical surveillance an nei nghal ang. Vawk leh ran damlo leh vawk thi rinhlehawm leh vawk tawlh ruk a rang thei ang bera a hnuaia phone number tarlante kaltlanga report turin DLCC chuan Lunglei District mipuite a hriattir a ni.

Lunglei District Rapid Response Team

Lunglei District Magistrate V. Lalsangliana chuan 26/08/2020 khan a hnuaia Order hi alo ti chhuak tawh a ni.

1. Thenawm ram (Bangladesh, Myanmar), State dang leh District dang atanga vawk, vawksa leh vawksa atanga eitur siam reng reng lakluh leh thawn chhuah khap tlat a ni.
2. Vawk thi reng reng paih mai lovin thuk taka phum thin tur a ni.
3. Vawk talhtu ten Vawk hrisel chauh an talh tur a ni.
4. Vawk neituten Vawk damlo an hralh tur a ni lo.