Nimin tlai khan Lunglei DC Conference Hall-ah ah Lunglei District Task Force Committee on Covid-19 chu an Chairman Pu V.Lalsangliana, IAS, Lunglei DC hovin an thukhawm a, Covid-19 avanga inkharkhip kalpui tawh china hmalakna hrang hrang te thlirletin, hmachhawp awm te an sawi ho. 14th April, 2020-a Mizoram Chief Secretary Order tihchhuah angin inkharkhip (Lockdown) kalpui mek chu thu leh awm hma chuan Lunglei District-ah a ngai anga kalpui chhunzawm a ni ang.

Lunglei DLTF on Covid-19 Chairman Pu V.Lalsangliana, IAS chuan Covid-19 avanga inkharkhip kalpui tawh chinah Lunglei District hmalakna tluang taka ala kal zel thu a tarlang a. Ei leh bar lakkhawm leh sem chhuah chungchangah te, dan leh thupek kenkawh leh VLTF-te duty na lamah harsatna liantham awm lovin inkharkhip leh a kaihhnawih thupek leh inkaihhruainate Lunglei District mipuiten an zawm tha hle a ni, a ti. District official-te, Veng hrang hrang Village Level Task Force leh volunteer te inpekna leh thawhrimna chu fakawm a tih thu sawiin an chungah lawmthu a sawi bawk. 

He meeting-ah hian Lunglei CMO Dr Thani Pachuau chuan report pe in 15/04/2020, Wednesday 11:30 AM H&FW Department record danin tun dinhmunah Lunglei District-ah mi 11 inkhunghrang mek an la awm a, hengte hi mahni  ina inkhunghrang (home quarantine) mi paruk (6) leh sawrkar ruahman Facility Quarantine ah mi panga (5) an ni. Inkhunghrang (Quarantine) te hi H&FW Department leh VLTF-te tangkawpin uluk takin an vil zel a. Tun dinhmunah Lunglei District-ah mi 737-in Quarantine Period tluang takin an zo fel tawh a, insawiselna an neih loh avangin Quarantine atangin thlah zalen (release) tawh an ni. Tin, Covid-19 vei emaw rinhlelh dah hranna tura buatsaih 'Isolation Ward'  khum 49 ruahman fel tawh niin tun dinhmunah Isolation Ward-a dah luh anla awmlo.

COVID-19 vanga inkharkhip laia Lunglei District chhunga mipuite'n ei leh bar leh an ni tin mamawh an tlakchham loh nana ruahmanna siamtu District Supply Chain Committee Member Secretary Lunglei DHO Pu L.Lalhmingmawia Pachuau chuan hemi kawnga an hmalakna tlangpui sawifiahin Lunglei District huamchhunga khaw 34 atangin thlai Lunglei khawpui leh a chhehvela sem chhuah turin lakkhawm mek zel anih thu a tarlang a. He hmalakna hi 28th March, 2020 atanga kalpui tan niin tun dinhmunah thlai thar trip 50 lak luh tawh niin heng thlai tharte hi a zavaiin cheng nuai 22.44 man hu a chhut a ni a. Lunglei leh a chhehvel mipuiten he hmalakna hi an hlut hle a, thlai lakluh te hi hralh zawh vek zel ala ni. Tin, tunlai hi lo, leipui leh chuktuah huana thlai chin hun lai a ni a. Inkharkhip vanga thlai chi lei theilo ten thlai chi an lei theihnan 09/04/2020 (Thursday) atang khan Horticulture Sales Emporium, DHO Office, Lungleiah kuthnathawktute thlai chi hrang 28 chi zawrh chhuah sak an ni a, Rs.1,83, 830/- man hu lai thlai chi hralh chhuah a ni bawk.

Tin, Lunglei Town chhung Dawr atanga mipuite nitin eibar lak/lei chungchangah kalphung fel zawk a awm theihnan kalphung felfai tak DLTF chuan a ruahman a. Nitin eibar (essential commodities) lei chungchangah Lunglei khaw pawn lam tan chaklak ni atan Monday leh Thursday ruahman niin Monday ah khaw 29, Thursday ah khaw 77 te bazar na hun siam sak an ni a. He ruahmanna hi tluang taka kalpui mek zel niin Committee chuan he kalphung hi chhunzawm zel ni se tih a rel.  

Lunglei District-ah hian VLTF 129 awmin hengte hi Village Council 113 leh Sub Village 16 an ni a. VLTF tin te hian sawrkar atangin Task Force Support Fund Rs. 5000/- (Cheng Sang nga) theuh an dawn bakah mimal, pawl leh kohhran atangin tanpuina sumfai, ei bar, leh invenna hmanrua engemawzat an dawng a. Mahni veng/khuaa chhuanchham awmte an tanpui mek zel a ni.  Committee on Utilization of Chief Minister’s Relief Fund in Order dated 9^th April, 2020 a tih chhuah angin Lunglei District chuan Covid-19 dona atan Rs. 25,18,000/- (cheng nuai sawmhnih panga, sing khat sang riat) he fund atang hian a dawng a. CM Relief Fund atanga sum dawn hi VLTF-ah te sem chhuak turin ruahmanna siam mek a ni.