Lunglei District Level Vigilance & Monitoring Committee chu vawiin khan Chairman MP (Lok Sabha) Pu C.L.Ruala kaihhruaina hnuaiah Lunglei Circuit House Conference Hall-ah an thukhawm a. He meeting-ah hian Committee Co-Chairman MP (Rajya Sabha) Pu Ronald Sapa Tlau bakah Tuipui 'W' Bialtu MLA Pu Nihar Kanti Chakma leh Lunglei West Bialtu MLA Pu Chalrosanga Ralte te pawh an tel.

Meeting hawnnaah Chairman Pu C.L.Ruala chuan member zawng zawngte lawmna leh inhmelhriatna hun a hmang hmasa a. Kumtharah hian taimakna leh inpekna thar nen sorkar hmalakna hrang hrang kalpui turin Member-te a sawm a, sorkar kut leh ke ber an nih avangin heng hmalaknate hlawhtlinna chu an chungah a innghat thui hle a ni tih a sawi. Mizoram pumah 'Fire Prevention Week' hman mek chu uluk lehzuala kalpui a tulzia sawiin Pu C.L.Ruala chuan kumtin lo hal avanga ramngaw tihchhiat tam ta lutuk chu sorkarin a ngaimawh hle a, hemi tihtlem nan tanrual leh vil ngun a pawimawh takzet a ni, a ti bawk.

Committee Co-Chairman Pu Ronald Sapa Tlau pawhin thu sawiin sorkar laipuiin a scheme leh project kalpui hrang hrangte chu nasa lehzuala bawhzui a tum avangin District Level-ah pawh a hma aiin taimak a ngai dawn a, heng sorkar hmalaknate vilna kawngah District Level Vigilance & Monitoring Committee chanvo leh mawhphurhna chu a sang hle dawn a ni, a ti. Committee Member-Secretary Lunglei DC Pu Abhijit Vijay Chaudhari chuan sorkar laipuiin heng scheme leh project-te zawhfel tura a hun ruat chhungah ngei Lunglei District-in hlawhtlinna a hmuh theih nan theihtawp chhuah turin a kaihhnawih member-department te a hrilh bawk.

DRDA Project Director, Lunglei District Pu Joseph Lalramsanga chuan an hnuaia sorkar hmalakna hrang hrang - MNREGA, IAY, IWMP, NSAP, NRDWP Leh Swacch Bharat (Gramin) chungchang sawizauvin sum pek an nih tawhna chinah chuan hna chak taka kalpui a ni tih a sawi a. Financial Year kal mek (2015-16) chhungah MNREGS hnuaiah Rs.2748.49 lakhs hmuh tawhin Job Card Holders mi 34141 tan ni 34 inhlawhna siamsak tawh a nih thu a tarlang. Kumin chhunga sum hmuh tur ang an hmuh hunah chuan ni 60 emaw a aia tam pawh inhlawhna siamsak leh hman an inbeisei thu a sawi bawk. MNREGS hnuaiah hengah te hian inhlawhna siam sak a ni : Land Development (terracing), Mulberry Plantation, M.Orange Plantation, Oil Palm Plantation, Mango Plantation, Banana Plantation, Rubber Plantation, Block Plantation, Papaya Plantation, Bamboo Plantation, Dragon Fruit Plantation, Roadside Plantation, Internal Roads, Farm Net Road, Side Drain, Drainange Channel, Composit Pit, Community Nursery, Eco Restoration, Contour Trenches, Fish Pond, Playground, Water Tank, Pond Construction, Dug Out Farm Pond, Afforestation (thingphun), Earthen Dam leh Irrigation Canal.

Community Nursery hi Environment & Forests Department nena tangkawpin Hnahthial leh Lunglei-ah tih chhin a ni a, a hlawhtling chho mek thu leh Tawipui N-II ah Strawberry chin chhin chu a hlawhtlin hmel hle tih tarlan a ni bawk a. Khaw hrang hrangah Self-Help Group dinte kaltlangin hmalakna engemawzat chu tihlawhtlin chho zel a nih thu BDO-ten an tarlang chu Co-Chairman Pu Ronald Sapa Tlau chuan mau leh changel hmanga themthiamthil siamchhuah lam pawh kalpui thei turin hmalakpui turin a hrilh.

Indira Awaas Yojana (IAY) hnuaiah sorkar kum kal mekah 1st Installment atan Rs.54 lakhs dawn tawh chu Lunglei, Hnahthial, Lungsen leh Bunghmun RD Block huamchhungah in 72 sak zawh tawh a ni a. IAY hnuaia In sak nan hian Sorkar Laipui Guidelines chuan tualchhung hmanrua (materials) a tam theih ang bera hmang turin a ti a, hei hian hnathawh a ti awlsamin hmanrua tlawm zawka hmuh theih nana tih a ni.

Swacch Bharat (Gramin) hnuaiah thingtlang leh khawpui chhunga Ek In (latrine) nei lo / nei tha lo chhungkua chhinchhiah an ni vek tawh a, chhungkua 928 te chu latrine sakna tanpuina pek an ni tawh bawk.

Heng bakah hian Parliamentary Standing Committee on Rural Development rawtna angin kumin atang hian District Level Vigilance & Monitoring Committee te chuan an huamchhunga Ministry of Tribal Affairs hmalaknate pawh enfiahin an vil tawh dawn a ni.