4885/2024-2025

Lunglei, 2025 Vau thla ni 28: Tun dinhmunah Lunglei District-ah thla 2 (hnih) dawn lai African Swine Fever (ASF) avanga vawk thi report a awm tawh loh laiin, Lawngtlai District-ah vawk thi awm nualin, he'ng vawk thite hi ASF avanga thi an ni tih Disease Investigation Laboratory, Aizawl leh Animal Health Centre/NERDDL Guwahati-ah te finfiah a nih avangin Lunglei District huam chhunga vawk vulhte an lo him zel theih nan leh ASF hri hi dan chah a nih theih nan Lunglei District Magistrate Pi Navneet Mann chuan vawiin, March ni 28, 2025 khan Section 163, Bharatiya Nagarik Suraksha Sanhita (BNSS), 2023 tlawh chhanin Lunglei District huam chhunga mipuite zawm turin heti ang hian thupek a chhuah.

"1. Lunglei District huam chhungah ram dang/state dang leh district dang aṭangin vawk, vawksa leh vawksa aṭanga siam ei tur chi reng reng lak luh khap tlat a ni.

"2. Lunglei District huam chhunga ASF hri lenna hmun (Infected Area) aṭangin vawk, vawksa leh vawksa aṭanga siam ei tur lak luh leh lak chhuah khap tlat a ni.

"3. Lunglei District huam chhunga khua leh khua inkarah vawk, vawksa leh vawksa aṭanga siam ei turte inlak pawh tawn khap tlat a ni.

"4. Vawk damlo reng reng talh leh hralh khap tlat a ni a, vawk damlo chu dah hran vat tur a ni.

"5. Vawk damlo neite'n a rang thei ang berin District Veterinary Hospital emaw, mahni khua/veng Veterinary Field Assistant (VFA)/Local/Village Council/Task Force-te hnenah hriattir vat tur a ni.

"6. Vawk thi leh suat tur neite'n AH&Vety Department-ah in-report zel tur a ni a. Vawk thi leh suat tur reng reng disinfectant (chinai/bleaching) nen thuk taka phum tur a ni a, bawlhhlawh paihna hmunah leh luikawr remchangah vawk thi chu paih hauh loh tur a ni.

"7. Vawk talh turte'n RAgT test an ti ngei ngei tur a ni a. RAgT test-a negative result leh soundness certificate (vawk hrisel ngei a ni tihchianna) neite chauh talh phal a ni.

"He thupek hian chhuah a nih aṭanga ni 60 (sawm ruk) chhung a huam ang a, thupek zawm lote chu Section 223, Bharatiya Nyaya Sanhita (BNS) hmangin hrem theih an ni.

"He thupek hian Order hmasa No.B.13011/41/2024/DCL/75 dated 21.02.2025 a luahlan nghal bawk ang."