4948/2025-2026

Lunglei, 2026 Vau thla ni 20: Tun lai hian Lunglei District huam chhungah phalna nei lote'n ṭhenawm ram Myanmar leh ram danga hralh tur tuialhthei (petrol leh diesel) an phur chhuak ṭhin nia report dawn a nih avangin vawiin khan Lunglei District Magistrate Pi Navneet Mann chuan Lunglei District aṭanga ṭhenawm ram Myanmar-a hralh tur tuialhthei phurh chhuah khap a nih thu hriattirna a chhuah.

Tuialhthei phurh chhuah phalna/storage licence nei lova tuialhthei phurh chhuah hi The Petroleum Rules, 2002 Rule 3 chuan a khap tlat thu leh dan zawm lote chu dan hmang vekin na taka hrem theih an nih thu tar langin, Lunglei District huam chhungah tuialhthei (petrol leh diesel) zuartute'n mipui (customer) hnenah tuialhthei hnianghnar taka an pek chhuah theih nan ṭhenawm ram Myanmar-a hralh tur tuialhthei phurh chhuah hi khap tlat a nih thu a tar lang.

He thupek zawm lote chu The Petroleum Act, 1934 Section 23 leh Bharatiya Nagarik Suraksha Sanhita (BNSS), 2023 Section 163 tlawh chhanin an chungah hremna lek kawh theih a ni ang, tih a tar lang tel bawk.