Vawiin chawhnu khan Pu James Lalnithanga, Election Officer, Lunglei District chuan Lunglei District huamchhung Assembly Constituency pasariha (7) Systematic Voters Education and Electoral Participation (SVEEP) Awareness Campaign nei tur Mobile Polling Station Van te Lunglei DC Office kawtzawl atangin a vailiam.

Pu James Lalnithanga chuan Electronic Voting Machine (EVM) leh Voter-Verified Paper Audit Trail (VVPAT) chungchang mipuite hnena a zau thei ang bera puanzar a tul thu a sawi a, hemi kawnga theihtawp chhuah turin kalkhawmte a sawm a ni. Lunglei District huamchhung Assembly Constituency pasarih atan hian Mobile Van pahnih theuh buatsaih niin heng Mobile Van 14 te hmang hian District chhunga hmun hrang hrangte tlawh tum niin EVM leh VVPAT hmanga vote thlak dan zirtirna pek zel tum a ni. Lunglei District-ah hian Polling Station 185 a awm mek a ni.

Systematic Voters Education and Electoral Participation (SVEEP) tum ber chu mi puitling vote nei thei chin India khua leh tui dik tak ten vote neih hlutna an hriat thar lehzualna tur leh vote thlak pawimawhna leh vote thlak ngei tura dan in min phut thu te inzirtirna a ni a. Lunglei District SVEEP hmalakna hnuaiah hian Slogan Writing Competition, Painting Competition, leh Rally te pawh buatsaihzel  tum a ni.