Vawiin chawhnu khan Lunglei DC Pu K. Lalrohlua kaihhruaiin a pisaah Lunglei District Planning and Monitoring Committee an thukhawm a. Kum 2017-18 atana District Plan siam dan tur an sawiho.

Meeting-ah hian Ministry of Tribal Affairs atangin Lunglei District tan cheng nuai 411.04 ruahman a ni tih tarlan a ni a. He sum hi tribal-te chawikanna tur a nih angin member tin te mahni department hmalak dan tur, Tribal Sub Plan (TSP) ruahman theuh tura tih an ni a. Heng TSP-te hi March ni 1, 2017 (Nilaini) aia tlai lova thehlut leh theuh tura tih an ni bawk.

District Planning and Monitoring Committee hi India Constitution Article 275(1) behchhan a din a ni a. Tribal-te dinhmun chawikanna atan District Plan siam thin a ni. Social Welfare nodal department niin, Health & Family Welfare, School Education, Commerce & Industries, Agriculture, Horticulture, AH & Vety leh Fisheries department te member an ni. He District Plan hi District Planning Committee in a pawmpui hnuah State Level-a ennawn leh thin a ni.