123/2022-2023
Lunglei 11th April 2022: Lunglei District Socio-Economic Development Policy (SEDP) Committee chu a vawiin khan vawikhatnan Lunglei DC Conference Hall-ah an thukhawm. Meeting hi District SEDP Committee Chairman Lunglei DC Pu Kulothungan A in a kaihruai a ni.

District SEDP Committee Chairman Lunglei DC Pu Kulothungan A chuan SEDP chu ram leh hnam hmasawnna tura sawrkar flagship policy anih angin Line Department-te leh member-ten theihtawp chhuah tlanga, Lunglei District-ah tha taka kalpui anih ngei theihnan theihtawp chhuah theuh turin a chah a. District ti hmasawn tura mawhphurhna fawng vuantute an nih angin an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel turin a chah a ni.

Vawiin meeting-ah hian Lunglei District-a SEDP kalpui dan tur tlangpui te, District SEDP Committee mawhphurna hrang hrang te leh Line Department-te hmalakna kal mek te leh hmachhawpte sawiho a ni.

Lunglei District SEDP Committee member Secretary chu Lunglei DRDA Project Director a ni a. District SEDP Committee hnuaiah hian Line Department sawm – Agriculture, Horticulture, Commerce & Industries, Fisheries, AH&Vety, Land Resources, Soil & Water Conservation, Land Revenue & Settlement, Rural Development, Sericulture leh UD&PA te an awm a. Member dang ruat te chu Pu K. Lalhnema, Lunglawn (Lunglei S); Pu K. Lalsailiana, Tlabung Zodin (West Tuipui); Pu Hlimthantluanga, Farm Veng; Pu R. Lalhmingmawia, Pukpui (Lunglei North); Pu Laltlanthanga, President, MJA; Pu H. Thangrenga, Salem Veng; Pu MS Dawngliana, Venglai (Lunglei West); Pu H. Lalremruata, Farm Veng (VC Representative); Pu ZD Lalthansanga, Bunghmun (Thorang); Pu H. Vanlalhruaia, Zobawk (Lunglei East) leh Pu Vanlalhmuaka, Electric Veng (Ex MNA) te an ni.

Tun dinhmunah Lunglei District Line Department pathum hnuaiah SEDP hmalakna a awm tawh a. Agriculture Department hnuaiah Lunglei District chhungah vaimim ching tur beneficiary 1665 thlan fel tawh an ni a. Tun dinhmunah vaimim chi 313.4 quintals sem tawh niin sem chhunzawm zel turin ruahmanna siam a ni. Fisheries Department hnuaiah sangha chi nuai 4 sem tawh a ni bawk. Horticulture Department hnuaiah mau ching tur chhungkaw 180 thlan tawh niin a hmunhma tur te vah leh hal fel tawh an ni a. Mau chin hun season ah ching nghal thei tura ruahmanna siam a ni.

Vawiin meeting-ah hian Village Level SEDP Committee din dan tur pawh sawiho niin Lunglei Additional DC Pu K.Lalrohlua Chairman na hnuaiah constituency tin aiawh te nen tun thla chhung ngeia ti fel tura mawhphurna pek an ni. Village Level SEDP Committee tinah hian Chairman leh Member Secretary te ruat tur an ni a. He mi bakah hian in 250 leh a hnuai lam chin awmna khua ah prominent citizen member pathum (3), in 251-500 chinah prominent citizen member panga (5) leh in 501 leh a aia tam ah prominent citizen member pasarih (7) te ruat an ni ang.

District Socio-Economic Development Policy (SEDP) Committee hi District chhunga SEDP tha taka kalpui tura mawhphurna neitu niin Village Level SEDP Committee te nen thawk hovin beneficiary-te an thlan dawn bakah SEDP kaihhnawih hnate viltu a ni a. An hmalakna kalpui tur hian SEDP Executive Board in tul a tih angin SEDP Fund a rawn ruahman sak thin dawn a ni.