No.738/2021-2022 

SOP for Lunglei.pdf

Lunglei the 30^th May, 2021 – Covid-19 hrileng avanga inkhuahkhirhna kalpui mek chungchanga Mizoram sawrkar thuchhuak Order No B.13021/101/2020-DMR Vol IV dated 29/05/2021 chu zirchiang tur leh Lunglei District tana inkhuahkhirhna kalpui dan tur ngaihtuahin vawiin khan Lunglei DC Conference Hall ah meeting neih a ni. Meeting hi Lunglei DC & Chairman DLTF Pu Kulothungan A in kaihruaiin DLTF member-te, VC Association hruaitute leh VLTF hruaitu thenkhat an tel.

Lunglei District-ah Covid-19 hrileng a darh zel loh nan inkhuahkirhna khauh zawka kalpui tum niin sawrkar thupek angin 07/06/2021 zing dar 4:00 thleng hman tur a ni ang.

Lunglei DC & Chairman DLTF Pu Kulothungan A chuan Lunglei District-ah Covid-19 hri kai hmuhchhuah belh zel an nih avangin mitinte kan fimkhur lehzual a tul takzet a ni, a ti a. Hrikai hnuchhui (Contact Tracing) atanga a lan danin chhungkhat laina te intlawh, thian tha te nena in len pawh leh thenawm hnai inlenpawhte kan la awm fo a ni tiin mahni in/compound chhuahsan loh bakah thenawm hnai leh building khata in hrang hrang luahte pawh in tlawh pawh rihlo turin mipuite a chah a ni. Covid-19 do kawnga District-in mamawh a neihte chungchangah Delhi lama NGO leh Company te a dawr mek thu sawiin Corporate Social Responsibility (CSR) kaltlangin ventilator, N95 mask, oxygen concentrator te dawn thuai beisei anih thu kalkhawmte a hrilh a ni. Tun dinhmunah Lunglei khawpui chhungah 4C pathum – Rahsiveng, Chanmari leh Electric Vengah a awm mek thu sawiin veng dangte pawh an remchan angin 4C ruahman tura hma lo la turin a ngen bawk a ni. Covid-19 hrileng avanga harsatna neite tanpui tura VLTF-te leh DLTF-ah donation thahnem tak lut mek chu lawmawm a tih thu sawiin mi inphal leh tlawmngai midang tana luang chhuak duh mi thahnem tak kan awm hi a lawmawm takzet a ni, a ti bawk.

Lunglei CMO Dr LC Liana chuan report pe in tun dinhmunah Lunglei District-ah Covid-19 positive mi 170 an awm mek a, ngawrh takin hrikai hnuchhui (Contact Tracing) leh testing kalpui mek zel a ni, a ti a. District chhunga DC-in containment area a puanah te medical team te in tinah kal chhuak tawhin Covid-19 hri lanchhuahna (symptom) nei an awm em tih en chhuah vek anih thu a report a ni.

Chief Minister’s Relief Fund (CMRF) atanga District-in Cheng nuai 5 a dawn hman dan tur pawh ngaihtuah ho niin hrileng avanga harsa leh chhuanchham mai tur chhungkua te Rs. 1,000/- theuh pek ni se tih niin heng hi a bialtu Incident Commander leh VLTF-ten inrawnin an sem chhuak dawn a ni.

Vawiin meeting ina an rel ho District SOP a hnuaia tarlan ang hi a ni:

LUNGLEI DISTRICT HEADQUARTER MIPUITE TANA INKAIHHRUAINA

1. MIPUI VANTLANG TANA INKHUAHKHIRHNA

1)    Hemi inkhuahkhirhna hun chhung hian tumahin mahni in/ compound an chhuahsan tur a ni lova, building khata in hrang hrang luahte pawh intlawhpawh loh tur a ni. Mahni vengchhunga thenawmte in-a len luh pawh khap a ni.

2)    Ṭul bik thil vanga chhuah ngai – damdawi lei tur, Doctor hnena inentir tur emaw loh theih loh-a chhuah ngai-te chuan an awmna VLTF te phalna an la hmasa tur a ni.

3)    Mahni chenna khua chhuahsana zin veivah khap tlat a ni. Amaherawhchu, chhiat tawh leh damlohna (medical emergency)-a mahni khua chhuahsana zin veivah a tul chuan mahni awmna veng/ khua VLTF te hriatpuina lehkha nen zin veivah theih a ni ang. Chu lehkha-ah chuan an kal tanna (origin) leh zinna/ kalna tur hmun (destination), zinna chhan, ni leh darkar te a chuang tur a ni. Heng bakah loh theih loh thila zin tul naah chuan Deputy Commissioner/ SDO (Civil)/ BDO ten phalna an pe thei ang.

4)    College/ University zirlai online exam tur te tan admit card lak/print out emaw signal thatna hmuna exam tura veivah chungchangah VLTF ten ruahmanna an siam anga, VLTF te ruahmanna siam chu an zawm tur a ni.

5)    Bungraw awmsa emaw siam chhuah/tharte heng balu, lung, rawra, brick, thingzai, furniture, steel fabrication etc kaihhnawih thiar/lak/sem khap a ni.

B. HE INKHUAHKHIRHNA HIAN A HNUAIA TARLANTE LEH HENG HMUNA           THAWKTE HI A HUAM LOVANG

1. Places/vehicles (Hmun/lirthei):

1. Hospital, nursing home, clinic, laboratory, OST center, OSC, ART centre, blood bank leh damdawi dawr.
2. Veterinary hospital, dispensary, clinic, zoo leh hatchery.
3. Bank, non-banking financial institutions, insurance, ATM leh post office. Hengte hian mipute nena indawr tam lo tur leh hnathawh tul bik chauh kalpui turin ruahmanna an siam ang.
4. Petrol/Diesel filling station leh LPG storehouse.
5. Fair Price Shop/ration dawr te leh FCS&CA Department/FCI hnuaia godown te.
6. COVID-19 duty te hman taxi leh rental motor, mahni motor (2 wheeler/ 4 wheeler) duty nana hman emaw duty na tur hmuna mahni chhungte/driver te inhruaitirna motor. Heng mahni lirthei keng emaw inhruaitir nana motor hmangtute chuan Covid-19 executive duty an nih thu chu lirthei registration number langin an thawhna Head of Office te hnen atangin hriatpuina lehkha an keng tur a ni.
7. Feed mill/Ran chaw zawrhna dawr leh AH & Vety slaughter house.

2. Services (Hna):

1. COVID-19 vaccination leh immunization programme dangte, ambulance service.
2. Animal disease control programme.
3. Postal service, blood donation camp/service.
4. Kohhran hna ṭul zual thawk tura Kohhran office kal leh kohhran hotute programme pawimawh bik.
5. Nau pai, nausen pawmlai leh naupang te hnena nutrition (chaw ṭha) sem bakah nutrition sem tur godown aṭanga phurh chhuah leh sem darh.
6. Bawnghnute sem leh lakkhawm.
7. Power & electricity, sanitation & solid waste management (hmunphiat leh bawlhhlawh paih te huamin), telecommunication, internet service, broadcasting leh cable service, septic tank service (ek paih), water supply (mimal tui chawite huamin), tui chawi/sem chhuak tur ten mahni chenna veng VLTF phalna/hriatpuina an nei tur a ni.
8. Print & electronic media leh chanchinbu sem.
9. Bungraw load leh unload hna chu VLTF te enpuina/ hriatpuina in tlai dar 6:00 atanga zanlai dar 12:00 thleng phal a ni.
10. Private security service.
11. Medical emergency leh chhiat tawh thila awmna veng LLTF/VLTF te hriatpuina lehkha nena chhuah.
12. LPG delivery service.
13. Inter- District-a bungraw phur courier service te.

C. DAWR INHAWN DAN TUR CHUNGCHANG

1. DAWR BUNGRAW SEM CHUNGCHANG

Thawhtanni (Monday) leh Ningani (Thursday) tlai dar 6:00 atanga zanlai dar 12:00 inkarah wholesaler/distributor ten VLTF hriatpuina-in zuar chhawng turte (retailer) hnenah bungrua an sem chhuak thei ang. Hei hi Thawhtanni (Monday) leh Ningani (Thursday) zan a tan chauh a ni ang.

Wholesaler/Distributor te kudam/ dawr-a zuar chhawng turten (retailer) bungrua la tura an kal khap a ni.

2. EICHAWP LEH RAN CHAW ZAWRHNA (ESSENTIAL COMMODITIES) DAWR

Thawhlehni leh Zirtawpni chawhma dar 10:00 atanga tlai dar 5:00 inkarah nitin mamawh eichawp (essential commodities) leh ran chaw zawrhna dawr chu a inhawng thei ang-a. Chawhma dar 10:00 leh chawhnu dar 2:00 inkarah Lunglei Town Area pawn lam tan bungrua a lamkhawm theih anga, chawhnu dar 2:00 atanga tlai dar 5:00 inkarah Town Area huam chhung tan bungrua a lamkhawm theih ang.

Mamawh lamkhawm turin chhungkaw pakhat atangin mi pakhat bak pawn chhuah khap a ni a, Bazar nan-a motor ken pawh khap a ni.

3. THLAI LEH SA ZAWRHNA

Thawhlehni leh Zirtawpni zing dar 5:00 atanga tlai dar 5:00 inkarah thlai leh sa zawrhna hmun te a inhawng ang-a, thlai leh sa te chu mahni vengchhung-a lei tur a ni a, mahni vengchhunga mamawh kim lo veng danga bazar tur te chuan mahni chenna VLTF hriatpuina/remtihna lehkha an keng tur a ni a. Mamawh lamkhawm turin chhungkaw pakhat atangin mi pakhat bak pawn chhuah khap a ni.

4. ZIRLAIBU ZAWRH NA DAWR (STATIONERY DAWR)

Thawhlehni chawhma dar 10:00 atanga tlai dar 5:00 inkarah hawn phal a ni a, mamawh lam tur chuan mahni veng VLTF ah phalna lehkha an la hmasa tur a ni a, mamawh lam turin chhungkaw pakhat atangin mi pakhat bak pawn chhuah khap a ni.

5. Thlai chi/tiak leh Agriculture/Horticulture/AH & VETY/ Fisheries kaihhnawih-a loh theihloha thlai chi sem/ar note sem/ sangha chi lak/sem etc chu phal a ni a, Head of Office leh Office awmna veng VLTF ten ruahmanna an siam ang a. Thlai chi/tiak leh agriculture kaihhnawih bungraw zawrhna dawr chu hawn phal a ni lo.

D. SAWRKAR OFFICE

District Administration, DM&R, H&FW, Home (Police, Fire & Emergency Services, Home Guard, Prisons, FSL), Excise forces, Finance, Treasury, Civil Aviation, I&PR, NIC, College bakah Department dang hnathawh tul zual ngaite chu COVID-19 dona leh hna ṭul bikah an kal thei ang. Head of Department/ Head of Office ten Detailment Order an siam tur a ni.

E. HMASAWNNA HNA THAWH CHUNGCHANG      

1. District Headquarter chhungah hmasawnna hnathawh hrang hrang, chhiatna (disaster) thleng thei laka invenna atana thawh tul zual a awm a nih chuan VLTF hnenah in report hmasa in, VLTF ten a tul dan a zirin phalna an pe thei ang. Chhiatna (disaster) kaihhnawih niloa hnathawh chu khap a ni.

2. District Headquarter pawn lama cheng te tan khuahkhirhna awm lovin hnathawh phal a ni a, District Headquarter-a cheng, lo leh huan neitute, ran vulhtute, sangha dil neitute leh a thawktute chu mahni chenna VLTF phalna/hriatpuina lehkha kengin an hna thawh phalsak an ni a, lo/huana hna thawk tura ram riah pawh phal a ni. Hmun khata mi 5 (panga) aia tam awmkhawm erawh khap a ni a. Lo/huana kal/feh turte chuan zing dar 9:00 hmain Town Area an chhuahsan hman tur a ni a, tlai dar 5:00 hma-a an rawn luh leh phal a ni lo. Tin, Police/ Covid-19 Executive Duty- te check theih turin VLTF te phalna lehkha emaw an kalna tur lo/ huan an nei ngei a ni tih lantirna document (LSC/P.Patta, adt) an keng tur a ni.