457/2022-2023
Lunglei, 11th May 2022: Lunglei District Task Force on Elimination of Malaria chu nimin tlai khan an Chairman Lunglei DC Pu Kulothungan A kaihhruaiin Lunglei DC Conference Hall-ah an thukhawm.

Meeting-ah hian Lunglei District Malaria Officer Dr Lalrinthangi leh line department hrang hrang PWD, PHE, I&PR, LAD, Fisheries, aiawhte an tel a ni.

Lunglei DC Pu Kulothungan A chuan Lunglei District chu Mizorama malaria tamna ber pahnihna anih thu sawiin malaria do kawngah tih tur tam tak kan nei a ni, a ti a. Line department-te chu tangruala anmahni zawn theuha mawhphurhna tha taka hlen chhuak tura chahin an mamawhte thlen thuai thin turin a chah bawk a ni.

Lunglei District Malaria Officer Dr Lalrinthangi chuan malaria chu ngaihthah chi a nih loh thu sawiin, malaria tam hun a nih chhoh dawn avangin inven fimkhur a pawimawh tak zet tih a sawi a. Thosilen zar hnuaia mut ngei ngei chu malaria laka invenna ?ha ber a ni tih hria a, uluk taka thosilen hmang hram hram turin District mipuite a chah a ni.

Lunglei District Malaria Officer Dr Lalrinthangi’n report a pe a. Kum 2021 chhung khan Lunglei District ah malaria case 1855 hmuhchhuah awmin heng zinga 1629 chu Malaria Pf niin 226 chu Malaria Pv an ni a. Nikum vek khan malaria avanga nunna chan mi pahnih awmin hengte hi Malaria Pf ve ve niin mipa Zawlpui khua leh hmeichhia Bazar Veng Lunglei (Tlawng kama huan a riak chhuak thin) an ni. Kumin March thla khan malaria test runpui (MSAT) neihah mi 54,597 test atangin malaria 456 hmuhchhuah niin heng zinga 50% te chu natna langchhuak lo (asymptomatic) an nih thu report a ni. Kumin chhungin malaria avanga nunna chan anla awmlo a ni.

NATIONAL VECTOR BORNE DISEASE CONTROL PROGRAMME (NVBDCP), Lunglei District te chuan malaria do kawngah hma la mek zelin awareness program, leaflet sem chhuah, thosilen sem, tui tlinna hmun te siam thata thenfai (source reduction) leh mass testing te an buatsaih a ni.