Vawiin khan Lunglei District Task Force for Immunization chu DC Conference Hall-ah Lunglei Additional DC Pu R. Vanrengpuia kaihhruaiin an thukhawm. Meeting-ah hian a kaihhnawih sawrkar department hrang hrang hotute, tlawmngai pawl aiawhte leh khawtlang hruaitute an tel a ni.

Meeting kaihruaitu Lunglei Addl DC Pu R. Vanrengpuia chuan Health & Family Welfare Department hnathawktute thawhrimna leh inpekna chu fakawm a tih thu sawiin hriselna chu ram hmasawnna bul leh innghahna a nih avangin thahnemngai taka hma la chhunzawm zel turin a chah a. Lunglei District chhungah tlawh pawh zung zung harsa deuh awm mah se, hri danna la turten kim taka an lak vek theih nan tan lak tlan a ngai a ni, a ti bawk.

Meeting-ah hian India ram puma naupang kum hnih hnuailam leh nu naupai in hri danna (vaccine) an dawn kim theihna tura hmalakna Intensified Mission Indradhanush IMI 2.0 thawh hnihna (2^nd Round) Lunglei District tana kalpui dan tur sawiho a ni a. He hmalakna hnuaiah hian Bunghmun PHC hnuaiah khaw pali (4), Lungsen PHC hnuaiah khaw paruk (6) leh Tlabung SDH hnuaiah khaw sawmhnih pathum (23) a zavaiin khaw 34 chhungah naupang kum hnih hnuai lam 167  leh nu nau pai mi 37 te January thla chhung hian hri danna pek an ni ang.

Lunglei District Immunization Officer leh SMO ni bawk Dr Lalrinthangi chuan Intensified Mission Indradhanush IMI 2.0 thawh khatna (1^st Round) kum kalta December thlaa neih zawh tak chungchang report pein naupang kum hnih hnuai target 188 neihah naupang 185 hri danna pek niin 98% achievement an nei a. Tin nu nau pai 45 target neihah mi 51 hri danna pek niin achievement hi 113% a ni. 

Universal Immunization Program hnuaia Lunglei District hmalakna te pawh sawilangin   india ram puma zenghri danna beihpui thlak Intensified Pulse Polio Immunization (IPPI) pawh chak taka kalpui zel anih thu a tarlang a. Lunglei District tana Zenghri danna pek chhuah beihpui hi 23^rd January 2020 neih leh tum niin sawrkar Hospital-te , Primary Health Centre leh Sub Division Hospital-te kaltlanga pek chhuah tum a ni a. OPV pek chhuah tur target hi naupang kum 5 hnuai lam te niin Lunglei District-ah target 13,708 an awm a. Hri danna pe chhuak tur hian pek chhuahna hmun booth 218 ruahman a ni ang.