No.249/2020-2021

Nimin khan Lunglei District Task Force on Covid-19 member-te chu Group hnihah inthenin  Lunglei Town Area-a VLTF-te an tlawh kual a, VLTF-te hmalakna tlangpui leh harsatna tawh te sawipuiin VLTF duty te hman tur mask veng tinah an hlan nghal a ni.

Covid-19 hrileng mek avanga inkharkhip kalpui mekah Lunglei District mipuite himna tur leh ei leh bar leh an nitin mamawh an tlakchham loh nan District Task Force leh VLTF-te tangkawp chuan theihtawp an chhuah mek zel a. Lunglei District-ah hian VLTF 129 awmin hengte hi Village Council 113 leh Sub Village 16 an ni a. VLTF tin te hian sawrkar atangin Task Force Support Fund Rs. 5000/- (Cheng Sang nga) theuh an dawn bakah mimal, pawl leh kohhran atangin tanpuina sumfai, ei bar, leh invenna hmanrua engemawzat an dawng a. Mahni veng/khuaa chhuanchham awmte an tanpui mek zel a ni. VLTF-te thawhrimna leh inpekna avangin District Task Force chuan an chungah lawmthu sawiin an harsatna neih te DLTF-ah thlen vat thin turin an chah a ni. 

Lunglei DC-in thupek alo chhuah tawh angin Lo/huana hna pawimawh leh tul thawktura feh leh thlai thar la tura chhuakte chu dan loh tur a ni a. Lo/huana hnathawk tura feh te chu a huho lovin, pakhat emaw, pahnih emaw an feh phalsak tur a ni a, silai an keng tur a ni lova. He thupek hi tha taka zawm anih theihnan VLTF-te chu an veng theuhah hma lo la tura chah an ni.

Tin, Lunglei Town chhung Dawr atanga mipuite nitin eibar lak/lei chungchangah kalphung fel zawk a awm theihnan kalphung felfai tak DLTF chuan a ruahman a. Nitin eibar (essential commodities) lei chungchangah Lunglei khaw pawn lam tan chaklak ni atan Monday leh Thursday ruahman niin Monday ah khaw 29, Thursday ah khaw 77 te bazar na hun siam sak an ni a. He ruahmanna hi tluang taka kalpui mek zel a ni. 

Tin, COVID-19 vanga inkharkhip laia Lunglei District chhung, a bik takin thlai tharlam hmuh zung zung tur a awm lohna Lunglei khawpui chhunga mipuite thlai thar mamawh pe chhuak tura a lak khawm leh sem chhuah buaipuitu District Supply Chain chu tluang taka kalpui zel a ni bawk a. Khaw 29 - Tuipui D, Thawizawl, Tlawng, Zawlpui leh Tuisenchhuah etc atangin thlai chi hrang hrang 40 chuang motor trip 43 lo thleng tawhin Lunglei khawpui leh a chhehvela sem chhuah mek zel a ni.

Vawiin 10/04/2020, Friday 10:30 AM H&FW Department record danin tun dinhmunah Lunglei District-ah mi 12 inkhunghrang mek an la awm a, hengte hi mahni  ina inkhunghrang (home quarantine) mi sawm pakhat (11) leh sawrkar ruahman Facility Quarantine ah mi pakhat (1) an ni. Inkhunghrang (Quarantine) te hi H&FW Department leh VLTF-te tangkawpin uluk takin an vil zel a. Tun dinhmunah Lunglei District-ah mi 718-in Quarantine Period tluang takin an zo fel tawh a, insawiselna an neih loh avangin Quarantine atangin thlah zalen (release) tawh an ni. Tin, Covid-19 vei emaw rinhlelh dah hranna tura buatsaih 'Isolation Ward' ah dah luh anla awmlo.