Vawiin khan Lunglei District Task Force for Immunisation Commitee chu an Chairman Lunglei DC Pu Ashish Madhaorao More, IAS hovin a office chamber-ah an thukhawm a. Sawrkar laipuiin rampum huapa hriselna lama a hmalakna thar tur ‘Mission Indradhanush’ chu Lunglei District huamchhunga kalpui dan tur an sawiho a ni.

‘Mission Indradhanush’ hi nikum December 2014 khan Ministry of Health & Family Welfare-in a duang chhuak a, rampuma vaccine lak that lohna District 201 thlan chhuah niin heng zingah hian Lunglei District pawh a tel a ni. Heng ‘High Focus District’ 201-ah te hian ‘Mission Indradhanush’ hi a bik taka kalpui a ni dawn a. He programme-in a tum ber chu India ram naupangte hridanna (vaccine) lak ngai zawng zawngte kum 2020 ral hma ngeiin naupang zaa 90% vaccine lak ngei ngei hman tir a ni.

Vawiin meeting-a rel a nih angin ‘World Health Day’ April ni 7, 2015 (Thawhlehni)-a hman tur rual khian Lunglei District atan ‘Mission Indradhanush Launching Programme’ hawnna nei nise, Khuallian Lunglei DC Pu Ashish More-in a hawng ang. A hmun tur chu RNTCP Conference Hall, Lunglei niin hemi ni hian Lunglei District hmun hrang hranga hriselna lama dinhmun tarlanna te, harsatna tawh mek leh tanlak ngaihna lai te bakah ‘Mission Indradhanush’ kalpui tum a nih dan te tarlan a ni bawk ang. Kumdang ang bawkin April ni 7 hi khawvel pumah ‘Hriselna Ni’ atana hman a ni dawn a, kuminah erawh chuan sorkar laipuiin a ngaih pawimawh em avangin hemi ni hian ‘Mission Indradhanush’ hawnna inkhawm chu a bik tak leh uar taka hawn nise tih Committee chuan an rel bawk a ni.

Lunglei District Task Force for Immunisation Commitee Member-te chu :

Chairman : Pu Ashish Madhaorao More, DC Lunglei

Member-Secretary : Dr.VLMS Dawngliana CMO Lunglei

Members :
1. Dr.Lalparliani, DIO Lunglei
2. Pu Lalchawimawia, DLAO Lunglei
3. Pi Vanlalpianpuii, DPO ICDS 

Lunglei
4. Pi Mina Zoliani, DIPRO Lunglei
5. Pu PC Lalhmunsiama, DPM, NHM 

Lunglei District
6. Pu Lalzidinga, DUDO Lunglei
7. Pu R.Lalnunthara, President, YMA Sub-Hqrs. Lunglei
8. Pi Zosangi, President, MHIP Sub-Hqrs. Lunglei te an ni.