No.4891/2020-2021

Lunglei 9th Sept. 2020 : Lunglei District chhunga Village Council inthlan neih zawh taka hnathawh dan tlang pui District Election Officer leh Deputy Commissioner ni bawk Pu V. Lalsangliana hovin DRDA Conference Hall, Lungleiah vawiin khan Nodal Officer te leh Returning Officer 50 thlanchhuah te nen thlir letna neih a ni.

He hun hi Pu J. Miahlung, Election Officer, Lunglei in a kaihruai a, Pu V. Lalsangliana chuan thu sawiin Inthlanna neih zawh takah Returning Officer te leh Polling Official te thawh hona chu fakawm a tih thu sawiin hmun hla tak tak, kalna harsa tak tak lawng leh ke bakah inbiakpawhna thalo tak tak ah te theihtawp chhuah a beiin inthlanna tluang taka neih theih a ni chu lawmawm a tih thu a sawi a, Returning Officer leh Polling Official te pawh hrileng avangin duh anga induhsak theih a ni ta lo chu pawi a tih thu a sawi bawk. A sawi zelnaah DC chuan tun tuma Lunglei District chhung khaw 111 a inthlan buaipuitu Official te, YMA leh YCA bakah venhimna hna thawktu Police te thawh rimnaah lawmthu a sawi a, inthlan a lo awm leh a nih pawn tuna thawktute tluka thlanawm tur chuang dang an loh thu a sawi bawk.

Vawiina Village Council inthlanna thlir letna hunah hian Lirthei kal dan ruahmanna,Training neih dan, inbuatsaihna, Polling booth buatsaih dan leh vote thi tam chhan chung changte, vote chhiar dan leh inthlanna hmanrua dawnsawn dan te sawi ho a ni.

Tun tum Village Council inthlanah khan Lunglei District chhung bikah inthlan buaipuitu Returning Officer 113 awmin Polling Officer 126 bakah 1st & 2nd Polling Officer 282 an awm a ni. Lunglei District chhungah hian inbiak pawhna that lohna hmun khaw 18 awmin Lawnga kal ngai khaw 18 a awm bawk a ni.

Vawiina meeting ah hian Lunglei DEO Pu V. Lalsangaliana chuan VC Election 2020 Lunglei Visual Documentary a tlangzarh nghal a ni.