No.2379/2020-2020

Vawiin khan Lunglei District Water and Sanitation Mission (DWSM) chu a vawikhatna atan an Chairman, Lunglei DC Pu V.Lalsangliana, IAS kaihhruaiin a office chamber-ah an thukhawm a, hma lakna tur ruahmanna hrang hrang an sawi ho.

State leh District Water & Sanitation Mission-te hi Sawrkar laipui Ministry of Jal Shakti hnuaia Jal Jeevan Mission (JJM) thiltumte ti hlawhtling tura din niin he scheme in a tum ber chu thingtlang chhungkaw tin te tui thianghlim hnianghnar tak leh man man taka anmahni inah ngei pek chhuah a ni a. Kum 2024 ral hma ngeiin India rama thingtlang chhungkaw (rural household) tinah tui connection (Functional Household Tap Connection - FHTC) pek chhuah tum a ni.

Chairman Pu V.Lalsangliana chuan member kalkhawmte hnenah lawmthu sawiin, Lunglei District thingtlang khuate'n tui thianghlim hnianghnara an hmuh theih nana ngaihtuahna seng turin a chah a. DWSM thutkhawma annual plan leh action plan thlir ho tur felfai tak an buatsaih avangin Rural WATSAN Division PHED hotute chu a fak bawk.

Member Secretary, PHED Lunglei Rural WATSAN Division-a Executive Engineer Er Laltlanchhunga chuan Jal Jeevan Mission (JJM) hnuaia kum 2024 hma ngeia thingtlang in tina tui connection pe kim hman tura hmalakna kal mek chungchang sawi fiahin, hmachhawp hrang hrangte a tarlang a. Lunglei District huamchhunga JJM hnuaia thingtlang in tina tui connection (Functional Household Tap Connection) pek turah hian kum 2019-20 chhungin khaw 31 leh kum 2020-21 atan khaw 19 tin zawn niin hemi atana action plan pawh peih fel tawh a ni a. Vawiin committee hian heng ruahmanna te hi pawmin Village Action Plan (VAP) leh District Action Plan (DAP) te a pawm a ni.

Tin, 2021-2024 chhunga hmalak belhna tur khaw 73 pawh duan lawk niin hengte hi State Level-ah la thlen leh tur a ni. Swachh Bharat Mission (Gramin) nena hmalak ho (convergence) dan tur pawh meeting neih leh ah Committee hian a ngaihtuah leh dawn a ni. Kalphung pangngai angin Lunglei Rural WATSAN Division hnuaia JJM hna kalpui turah hian Lunglei Sub Division North, Lunglei Sub Division South leh Tlabung Sub-Division-a SDO-te chu an bial chhunga Work Manager atan ruat nghal an ni bawk.

Vawiin Lunglei District Water and Sanitation Mission meeting ah hian member-te – CMO, PD DRDA, DFO, DEO, DAO, EE I&WR, DIPRO te an kal kim a ni.