1645/2022-2023
Lunglei the 18th August,2022 - Vawiin khan Lunglei District Water & Sanitation Committee (DWSC) chu an Chairman, Lunglei Bawrhsap Pu Kulothungan A, IAS hovin DC Conference Hall-ah an thukhawm. Meeting-ah hian Lunglei District-a Jal Jeevan Mission hnathawh kal mekte leh hmachhawpte sawiho a ni.

State leh District Water & Sanitation Mission-te hi Sawrkar laipui Ministry of Jal Shakti hnuaia Jal Jeevan Mission (JJM) thiltumte ti hlawhtling tura din niin he scheme in a tum ber chu thingtlang chhungkaw tin te tui thianghlim hnianghnar tak leh man man taka anmahni inah ngei pek chhuah a ni a. Kum 2024 ral hma ngeiin India rama thingtlang chhungkaw (rural household) tinah tui connection (Functional Household Tap Connection - FHTC) pek chhuah tum a ni.

Member Secretary, PHED Lunglei Rural WATSAN Division-a Executive Engineer Er Laltlanchhunga chuan Jal Jeevan Mission (JJM) hnuaia kum 2024 hma ngeia thingtlang in tina tui connection pe kim hman tura hmalakna kal mek chungchang sawi fiahin, hmachhawp hrang hrangte a tarlang a. Sawrkar laipui hun bituk chu 2024 ni mah se, Mizoram sawrkar chuan JJM chu 2023 ral hma ngeia thawh zawh a tum thu a sawi bawk.

Lunglei District huamchhunga JJM hnuaia thingtlang in tina tui connection (Functional Household Tap Connection) pek turah hian khaw 120 ah hmalak tum a ni a. Kum 2019-20 chhungin khaw 31, leh kum 2020-21 ah khaw 19 zawhfel niin household 7104 ah tui connection pek tawh an ni. Kum 2021-22 atan khaw 19 thawh leh mek niin 2022-23 chhungin khaw 51-ah zawhfel tum a ni. Heng zingah hian ni zung chakna hmanga tui pump (solar water pumping) chu khaw 41 ah kalpui a ni. Hemi bakah hian khaw 68-ah Compost pit leh khaw 12-ah soak pit siam tum a ni bawk.

Meeting-ah hian Swachh Bharat Mission - Gramin (SBM - Gramin) hnuaia hmalak zel dan tur pawh sawiho niin pawn lera inthiar an awm loh na Open Defecation Free Plus (ODF Plus) endik tu tur Verification Team din nghal a ni a. Lunglei District chhunga BDO-te bakah LAD, H&FW, I&PR, School Education leh Agriculture Department aiawhte member-ah ruat an ni.

Lunglei District Water & Sanitation Committee (DWSC) ah hian Lunglei DC chu Chairman niin SE, PHED chu Executive Vice Chairman a ni a, EE, PHED Rural Watsan Division chu Member Secretary a ni. CMO, PD DRDA, Programme Officer SWD, DEO, DAO, DLAO leh DIPRO te member an ni.