Mizoram inthlan chhunga Lunglei District tana Election Commission-in Expenditure Observer tura a ruat Pu Imokaba Jamir, IRS chuan nizan khan Lunglei a thleng a, vawiin khan Lunglei DC’s Conference Hall-ah Lunglei DC/DEO Pu V.Sapchhunga kaihhruaina hnuaiah Election Officials hrang hrangte nen meeting pawimawh tak an nei a ni.

Election Expenditure Observer chuan inthlan chhunga mawhphurhna hrang hrang kengkawh tur officials leh team hrang hrangte fuihin thawhhona tha leh langtlang neih a duh thu leh an thawh tur theuhah taima leh rinawm taka thawk turin a chah a ni. Lunglei District huamchhunga Assembly Constituency 7 awmte tana DEO Pu V. Sapchhunga kaihhruaina hnuaiah ruahmanna tha leh felfai tak siam a nih tawh chu lawmawmin a entawntlak a ni, a ti a. Amah pui tura Assistant Expenditure Observers ruatte chu training neihpui a tum thu a sawi bawk a ni. He meeting-a tel Media Certification & Monitoring Committee leh Expenditure Monitoring Team member-te chuan an hmalakna hrang hrang Expenditure Observer hi an hrilh bawk a ni.

Meeting zawhah hian DC/DEO Expenditure Observer Pu Imokaba Jamir chuan MCMC Office, Static Surveillance Team Office leh Accounting Team office te a tlawh vek a. Pu Jamir hi Lunglei DC Pu V.Sapchhunga, Addl. DC Dr.Andrew H.Vanlaldika, Election Officer Pu Mark Lalthanliana, Treasury Officer Pu C.Lungmuanpuia leh DIPRO Pi Mina Zoliani ten an tawiawm a ni