No.1913/2021-2022

Lunglei 18th Aug. 2021 : Vawiin khan Lunglei Government College buatsaihin an zirlai tithate hnenah lawmpuina leh chawimawina Lunglei Bawrhsap Pu Kulothungan A chuan a hlan.

Lunglei Government College a zirlai tithate chawimawina hun hman hi Pu C. Zairemthanga, Vice Principal LGC in kaihruaiin he huna khuallian Lunglei DC Pu Kulothungan A chuan, Lunglei Government College atanga UG Exam a ti tha zual mi 7 te bakah B.A. leh B. Sc. a mark hmu sang mi 11 te hnenah lawmpuina thu ziak leh pawisa fai a hlan.

Lunglei DC Pu Kulothungan A chuan zirlai kal khawmte hnenah fuihna thu sawiin Lunglei Government College atanga mi ropui tak tak an lo chhuah tawh thu sawiin, zirtirtute leh zirlaite tum ruhna avanga hlawhtlinna chang mi tam tak an awm tawh chu lawmawm a tih thu a sawi a, Lunglei DC chuan mihring kan nih chhungin theihna hrang hrang kan neihte chu tangkai tak a hmang turin zirlaite a fuih bakah chutiang thleng tur chuan tumruhna leh taihmakna a pawimawh thu a sawi bawk a ni. Lunglei DC chuan Lunglei Government College in mi rintlak leh mi hlawhtling a chher chhuah zel theih nan theih tawp chhuah pui a tum thu a sawi bawk a ni. Civil service chungchang sawiin Lungleiah ngei Awareness Proramme siam chu tul a tih thu sawiin hei hian zirlaite inbuatsaihna kawngah rah tha tak a chhuah a beisei thu a sawi bawk a ni.

Lunglei Government College principal Pu LH Rothangan report a pek danin Lunglei Government College hi kum 1964 a din niin 1976-ah sawrkarah dah ngheh a ni a, 2017-ah Naac grade B++ ah chuangkaiin tun dinhmunah zirtirtu 69 awmin non-teaching staff 15 an awm a, zirlai 1236 an awm mek a ni.