Lunglei District High Power Committee, Vice Chairman Office chu vawiin khan Chief Minister’s Office building Room No.8 ah hawn a ni. Committee Vice Chairman hi Pu Joseph Lalhimpuia, MLA a ni.
 
 
Hawnna inkhawm hi Pi M.Zohmingthangi, IAS, D.C. Lunglei District & Secretary, High Power Committee, Lunglei District ni bawk chuan a kaihruai a. Chief Minister Pu Lal Thanhawla chuan thu sawiin, Lunglei district mipui ten chak leh zuala hamsawnna an neih theih nan he Committee hi din anih thu a sawi a. A hnathawh dan tur (a concept) ang chiaha hmasawnna hna thawh chu kal chhohpui anih tur thu a sawi a ni. Chief Minister chu he Committee Chairman anih avangin phuisui zawk leh tluang taka hna a thawh theih nan he office hi a office buildinga dah anih thu a sawi bawk a. Planning department nen thawkdun zel tur anih thu a sawi bawk.

Committee Vice Chairman Pu Joseph Lalhimpuia pawhin thu sawiin, chhim bialin chak zawka hma a lak theihna tura hetiang Committee din a ni chu Chief Minister chungah lawmthu a sawi a.Chhim bial mipuite chu an lawm hle thu  sawilangin, beiseina sang tak an neih thu a sawi a. Mipuite talent leh an thil tih theihte chu he committee hian pholangin, tangkai taka hman theih a beisei thu a sawi bawk a. Pu Josepha chuan chhim bial mipui ten hniam bik anga an in hriat thinna atanga khaichhuah a tum thu sawiin, Lunglei district hmasawnna chu Mizoram hmasawnna a ni a ti..

Hawnna inkhawmah hian MLA thenkhat bakah Pu Josepha chhung leh khatte, CM’s secretariat staff te, Lungleia sorkar official thenkhat leh Planning department officers te an tel a ni.

Attachment

  • Loading attachment...