Lunglei District High Powered Committee hnuaia hnathawh dan hrang hrang thlirhona, Monitoring Committee chu vawiin khan Circuit House Conference Hall ah neih a ni. He Meeting HPC Vice Chairman Pu Joseph Lalhimpuia kaihruaiah hian Lunglei a sawrkar Department hrang hrang hotute bakah HPC member te an tel kim hle a ni.

Meeting-ah hian HPC sum hmanga Department hrang hrang kaltlanga hnathawh tawh te leh hna kal mek te thlirhona neih niin, Department hrang hrang hotute hian an Department kaltlanga hna an thawh dan leh a that tawk leh tawk loh dan te report an pein, hmun tam takah hna tha taka thawh a nih lai a hna tha tawk lo a awm thu te pawh he hunah hian sawilan a ni. Hetianga sawihona hrang hrang atang hian HPC sum hmanga Department hrang hrang hnuaia hnathawh te chu tha zawk leh belhchian tlak zawka thawh a nih theih dan tur sawiho niin, ruahmanna hrang hrang siam a ni bawk.

Vawiina meeting ah hian HPC Vice Chairman Pu Joseph Lalhimpuia chuan tunah hian Finance Department lam pawhin sum hmanna head pawh an siam fel vek tawh a, kan hnathawh dan te pawh deptt hrang hrang ten mumal zawkin kan siam thei tawh dawn a ni tiin, kumthar sum pawh hman mai theih tura peihfel a nih tawh avangin chak taka hman zung zung a nih theih nan Department tin ten theihtawp i chhuah theuh ang u, a ti bawk a, a tul a nih chuan Revise Estimate pawh siamin sum dil belh theih a nih thu a sawi.

Meeting-ah hian HPC Secretary Lunglei Bawrhsap Pu V. Sapchhunga chuan HPC avanga Lunglei in hmasawnna nasa tak a neih thu sawiin, awmze nei leh tangkai zawka HPC chu hman zel a nih theih nan Department hotute pawhin tan la leh zual se a duh thu a sawi bawk.