No.1987/2021-2022
Aizawl 25th August, 2021 : Vawiin khan Baptist Church of Mizoram (BCM) buatsaih Covid-19 positive te enkawlna hmun Baptist Covid Care Centre (BCCC), Serkawn chu Lunglei HPC Vice Chairman Pu Lawmawma Tochhawng hova tlawhin Covid-19 dona hmanraw hrang hrang hlanna hun hman a ni. HPC Vice Chairman leh amah zuitute hi Rev R.Lalbiakliana, AGS, Dr Lalramzauva, Director, Medical & Health Department, BCM leh an thawhpuiten anlo dawngsawng a. Covid-19 dona hmanrua te hi MNF Sub Hqrs Lunglei President Pu H.Thangrenga’n a hlan a ni.

Lunglei HPC Vice Chairman Pu Lawmawma Tochhawng chuan Baptist Church of Mizoram (BCM) ten mipuite hmakhua ngaia Covid-19 positive te enkawlna hmun changtlung tak Baptist Covid Care Centre (BCCC) an ruahman chu ropui a tih thu sawiin BCM hruaitute leh thawktute zawng zawng chungah lawmthu a sawi a. Covid Care Centre enkawl chu thil namai lo leh sum leh pai senso pawh a hautak hle a ni tih Sawrkarin a hriatpui a ni tiin vawiina Covid-19 dona hmanrua te pawh hi Mizoram Health Minister Dr R Lalthangliana ruahmannaa lo thleng a nih thu leh hun lo kal zel tura an mamawh dangte pawh sawrkarin a theih anga ruahman pui a tum thu a sawi a ni.

Rev R.Lalbiakliana, AGS leh Dr Lalramzauva, Director, Medical & Health Department, BCM te pawhin thu sawiin sawrkarin Baptist Covid Care Centre (BCCC) a ngaihvenna avangin lawmthu an sawi a. Pawl hrang hrang leh mimal thil phalte atangin sum fai bakah bungrua leh khawl engemawzat dawn anih tawh thu pawh tarlangin lawmthu an sawi a ni.

Vawiina Covid-19 dona hmanrua hlan te hi PPE Kit, Face Mask, Sanitizer, Sodium Hypochlorite etc te an ni.

Baptist Covid Care Centre (BCCC) hi July 28, 2021 khan hawn niin July 30 atangin Covid damlote admit-a enkawl tan an ni a. BCCC-ah hian tun dinhmunah khum 23 awmin Doctor 1 leh Nurse 4 te bakah Office staff 2 leh thawktu dang 7-in an enkawl mek a. He Centre hawn anih atanga vawiin thlengin Covid-19 positive mi 60 admit tawh niin tun dinhmunah enkawl mek mi 12 an awm a ni.