No.459/2020-2021

Tunlai hrileng mek Covid-19 avanga inkharkhip kalpui mek anih laiin vawiin khan Lunglei HPC Vice Chairman Pu Lawmawma Tochhawng chuan Tlabung Sub Division huamchhunga Bangladesh ramri hrul khua te tlawhin Border area-a venhmina kalpui dan a hmunah kalin a enfiah.

HPC Vice Chairman hi Lunglei atangin official - te, HPC member - te leh party hruaituten tawiawmin Tlabung ah West Tuipui Assembly Constituency bialtu MLA Pu Nihar Kanti Chakma leh SDO (C) Pu Lalsanglura hovin official - te, VLTF-te leh helai ramri vengtu BSF Battalion pahnih - 131 Battalion Commandant Pu KS Nautiyal leh 60 Battalion Commandant charge la mektu Pu Suhel Ahmed ten an lo dawngsawng a ni.

HPC Vice Chairman hian Kawrpuichhuah, Bindiasora, Tipperaghat ah te Border Outpost (BOP), border fencing leh gate te tlawhin ramri venhmina hi a hmunah uluk takin a enfiah a. Helai ramri vengtu 131 Battalion BSF leh 60 Battalion BSF hotute chuan Lunglei District ah Border Outpost (BOP) 26 ah BSF Sipai nitin darkar 24 uluk taka an duty reng thu an report a, Civil administration, Mizoram Police leh VLTF-te nen thawhhona tha tak neiin tun dinhmunah ramri venhim kawngah harsatna an neih loh thu an tarlang a. Mizoram huamchhunga India - Bangladesh border hi 318 kms a thui niin Lunglei District ah ramri hi 112 kms a thui a ni. Ramri lehlam Bangladesh-a Rangamati District- ah tun dinhmunah Covid-19 vei hmuhchhuah anla awmloh thu BSF hotute hian an report bawk. Pu Lawmawma Tochhawng chuan Covid-19 chu inkaichhawn awlsam tak anih avangin ramri venhim hnathawktute chu tha thlah lova uluk leh fimkhur taka an duty chhunzawm zel a tul a ni tiin BSF hotute chu tan la sauh turin a fuih a ni.

Vawiin ah vek khan Tlabung SDO (Civil) pisa-ah official - te leh VLTF - te nen meeting neih niin HPC Vice Chairman chuan Sub Divisional Task Force, VLTF-te leh Damdawiin te inpuahchahna felfai tak chu fakin, hrileng mekin engtik thleng nge a awh dawn a hriat lohva, kan hnaivai maia awm State leh ram dangah te a pung zel a, kan fimkhur lehzual a tul takzet a ni, a ti a. VLTF-te leh volunteer-te inpekna leh thawhrimna fakawm a tih thu sawiin an chungah lawmthu a sawi a, Covid-19 do zel tura kawng engkima hmalak pui chhunzawm ah a sawm bawk. Ram venhim nana khawtlanga lungrual taka thawhhona awm thin chu lawmawm a tih thu sawiin dan lova ramri kan a Mizorama Iuh ruk tumte lakah uluk lehzuala ramri venga duty turin official-te leh VLTF-te a chah nawn leh a ni.

Tlabung SMO Dr R. Lalnienga chuan report pe in he hrileng hlauhawm tak COVID-19 laka lo invenlawkna turin H&FW Department hmalaknain 10th February, 2020 atang khan Kawrpuichhuah-ah ‘Coronavirus Screening Point’ siam tan niin Medical Team-te nitin an duty thin a. 2nd March, 2020-ah khan Missionary Kai leh Licheng Kai ah te ‘Coronavirus Screening Point’ hi neih belh niin 20th March, 2020 thleng khan screening hi kalpui a ni a, screening kalpui chhung hian COVID-19 vei rinhlelh an awmlo a ni.

Tin, Tlabung SDO Civil Pu Lalsanglura Chairman na hnuaiah Sub Division Level Task Force on Mitigation of Coronavirus chu 19th February, 2020 ah khan din niin a tul angin he Task Force hian hma a la nghal a. Tlabung Sub Divisional Hospital-ah COVID-19 vei rinhlelh te dah hranna tur khum pathum (3) awmna Isolation Ward a buatsaih a. Tin, India ram pawn leh phai atanga lo haw dah hranna/ inkhunghranna (Quarantine) na atan Quarantine Facility pahnih Tlabung Tourist Lodge hlui leh a thar ruahman a ni a. Quarantine Facility-ah hian a zavaiin mi 12 dah luh tawh niin hengte zinga mi 11-te chu an Quarantine period zo tawhin insawiselna an neihloh avangin Quarantine atangin thlah zalen (release) tawh an ni a. Mi pakhat ala awm mek a. Tin, mahni ina inkhunghrang (Home Quarantine) mi sawmkua (90) awm tawhin an zavai hian Quarantine atangin thlah zalen an ni tawh.

Buhfai stock leh essential commodities dinhmun tlangpui Pu R. Lalzirliana, Inspector FCS&CA Tlabung in report a pe a. Tun dinhmunah buhfai leh essential commodities stock dinhmun a that thu leh hlauthawnawm a awmloh thu sawiin Buhfai 5234.83 quintal stock a awm mek a, thla khat a sem chhuah zat thin chu 1850 quintals a nih thu a tarlang a. Sawrkar laipui PM Garib Anna Yojana kaltlangin Priority Household (PHH) leh AAY ration card neite hnenah thla thum chhung (April, May, June) thla tin buhfai kg 5 theuh a thlawna pek an ni dawn bawk a ni.

VLTF-te hian an harsatna leh mamawhte HPC Vice Chairman hnenah hian anlo thlen a. Lunglei High Powered Committee Vice Chairman hian VLTF te hnenah tanpuina sumfai, mask leh kut silna (hand wash) a hlan a ni.