Vawiin khan Lunglei Chhim lama awm Mualcheng S khua chuan Pawl Kut an hmang a.  Lunglei South Assembly Constituency bialtu MLA leh Lunglei High Powered Committee Vice Chairman ni bawk Pu S. Laldingliana’n a hmanpui.

He hun hi Mualcheng S YMA President Pu Vanlalthangan a kaihruai a, Khuallian Pu S Laldingliana lunglei Dist. HPC Vice Chairman chuan thu sawiin Mualcheng khua chu Model Village a puan a lo nih tawh anga Faina leh hmasawnna hrang hrang hmuh tur awm chu lawmawm a tih thu a sawi a, hmasawnna kal mek zingah Community hall sak mek chu fur a thlen leh hmaa zawhfel a nih tur thu a sawi bawk.  Mualcheng S khua in thlawhhma a lakna ber Thlisam leh Fenbeh kawngte chu motor luh theih tura siam chhunzawm a nih tur thu a sawi lang bawk a ni.

Vawiina Mualcheng South khuain Pawl Kut a hmanna hunah hian Mizo hnam zai leh lam chi hrang hrang entir a ni a, mizo infiamna chi hrang hrang Insaihruipawh, Insuknawr leh Inhmawlhtepek bakah intlansiak hmangin infiam entir a ni a, Hlado chi hrang hrang an khaw valupa ten an chham bawk a ni. Vawiina Pawl Kut hmanna hi zan lam thlengin programme duan a ni. Vawiina Pawl Kut pual hian  khawtlang huapin  vawk an talh a, chhungtin ten kut sa atan an la theuh a, kut chawhmeh tur hi Pu S. Laldingliana an bialtu MLA hian a tum sak a ni.