No.1254/2021-2022

Lunglei the 5th July, 2021 - Vawiin khan Lunglei HPC Vice Chairman Pu Lawmawma Tochhawng chuan Lunglei Press Club, Bazar Vengah Lunglei District chhunga Accredited Journalist 19-te hnenah Press Accreditation Card a hlan.

Press Accreditation Card semchhuah inkhawm DIPRO Lunglei Pi C.Lalremruati kaihhruaiah HPC Vice Chairman chuan journalist-te chu ram inrelbawlna leh hmasawnna hnathawh kawngah hmun pawimawh tak luahtu an nih anga an nihna an hriata, mipui tana rawngbawlna hna rinawm taka thawh a tul thu sawiin Media mi te chu thudik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a. Accredited journalist-te chu dinhmun ngaia ding lova intuai hriam chunga hmasawn zel tur leh accredited an nih ang ngeia an rintlak zia tilang thin turin a sawm a ni.

He huna thu sawitu dang Lunglei MJA President Pu H. Lalthansanga pawhin chanchin thar thehdarhtute chu thu dik puan chhuah kawngah tan la leh zual tur leh taihmak chhuah zel turin a fuih a. Press Accreditation Card chuan mawhphurhna lian tak a ken tel avangin a vawngtu theuh ten mawhphurhna hlen chhuak tura tan an lak tlan a tul thu a sawi bawk.

Mizoram sawrkar hnuaia Mizoram Press Representative Accreditation Committee chuan Accredited Journalist ni thei turin Mizoram pumah journalist mi 153 thlang chhuakin Press Accreditation Card a ti chhuak a. He Card hi kum 2 chhung (March 2023 thleng) a nung (valid) a ni. Lunglei District atangin Accredited journalist thlan chhuah mi 19 awmin an zinga mi 17 hi Lunglei town chhung ami niin journalist pahnih Pu C.Lalremruata, Editor Lungsen Post, Lungsen khua leh Pu Lalhmachhuana Ralte, Editor Lawhleng, Haulawng khua te chu accreditation hmu thar an ni.