Tukin zing dar 8:00 khan Lunglei Ramthar vengchhung inkalpawhna kawng RCC paving cheng nuai 7 chuang senga siam chu bialtu MLA Pu Lawmawma Tochhawng, Vice Chairman HPC Lunglei chuan mipuite hman theih turin a hawng.

Pu Lawmawma Tochhawng chuan Ramthar VC te thahnemngaihna leh mi tlawmngai te inpekna avanga inkalpawhna kawng pawimawh tak siam a ni chu lawmawm a tih thu leh vengchhung mipui ten tangkai taka an hman a beisei thu a sawi. Pu Lawmawma Tochhawng chuan vengchhung hmasawnna hi vawikhat ah lian tak tih theih nilo mahse tlem te te infawk khawm hian hmasawnna lian tak min thlen thin a ni tiin, tuna kawng hawn tak pawh hi a neitu veng mipui ten kan hlut thiama kan enkawl thiam a pawimawh a ni, a ti. 

Tukina HPC Vice chairman in a hawn tak kawng hi Ft. 321 a sei, Ft. 10 a zau niin, cheng nuai 7, sing 4, zariat sawmhnih pathum (Rs 7,40,823/-)senga siam RCC Paving niin, May ni 8 atanga June ni 15.2020 chhunga bialtu MLA leh VC te thawhkhawm atanga siam a ni.

Tukina kawng hawn inkhawm hi Pu H Lalramliana VCP Ramthar vengin a kaihruaia Official, Media te leh vengchhung NGO hrang hrang aiawh te an tel a ni.

Tin,vawiin vek khan HPC Vice Chairman leh amah zuitute hian Ramthar Veng chhunga Commerce & Industries Department hmalakna Handloom Centre buatsaih mek leh Ramthar Veng Hall sak mek tlawhin a hnathawktute harsatna te sawipuiin ruahmanna a siam pui a ni. 

Attachment

• Loading attachment...