Vawiin khan UD&PA Department kaltlanga Integrated Housing & Slum Development Project (IHSDP) hnuaia sak ‘Salem Veng Community Centre’ chu Lunglei HPC Vice-Chairman Pu S.Laldingliana’n a hawng. He hunah hian Lunglei West bialtu MLA Pu Chalrosanga Ralte leh LDCC Vice-President Pu C.Robuanga te pawh an a tel a; Lunglei District Department officials engemawzatin HPC Vice-Chairman hi an tawiawm bawk a ni.

Community Centre hawnna inkhawm UD&PA Director Pu Zorammuana kaihhruaiah Khuallian Pu S.Laldingliana chuan Salem Veng-in Community Hall a neih theihna tura hmala tu UD&PA Minister Pu Zodintluanga leh Department hotute chungah bialtu MLA a nihna angin lawmthu a sawi a. Mizoten kawng hrang hrangah hmasawnna tur kan nei zingah vantlang thilte mahni ta anga en thiama, enkawl leh dimdawi kan zir a tul tak zet a ni, a ti. Sorkarin sum tam tak senga mipuite tana thil chhenfakawm a tih sak thin te chu mipuite bawkin duat nachang hre lovin kan tichhe mai thin a, hei hi a pawi hle a ni tiin Pu S.Laldingliana chuan Salem Veng mipuite pawhin an Hall thar neih chu duat zui a, khawtlang tan tangkai taka an hman theih nan duhsakna a hlan a ni. He Community Centre lungphum chu Pu S.Laldingliana tho hian nikum July ni 31, 2013 khan a phum nghe nghe a ni.

UD&PA Department Director Pu Zorammuana pawhin thu sawiin Mizoram hmun hrangah an Department hmalaknate a tarlang a, Khuallian Pu S.Laldingliana’n Salem Veng Community Centre atana plastic chair 100 pek tura a ngenna angin UD&PA department chuan a rawn tihlawhtlin sak ngei tur thu a sawi bawk.

UD&PA Asst. Engineer Er.Laldunsanga Hnamte-in Technical Report-a a tarlan danin nikum ni 11.9.2013 atang khan Salem Veng Community Centre hi sak tan niin kumin 1.3.2014 khan Rs.32,59,244 sengin he Centre hi sak zawhfel a ni a. A vang zawng 36 ft, a sei zawng 64 ft leh a san zawng 24 ft. a ni.