2815/2024-2025

2024 Sahmulphah thla ni 3: Lunglei High Powered Committee (HPC) bul tuma Mizoram Basketball Association (MBBA) leh Lunglei District Basketball Association (LDBBA) te ṭang kawp huaihawt HPC-MBBA Inter-District Basketball Tournament 2024 hmawr bawkna hun (grand finale) chu nizan khan Chanmari Hall, Lungleiah buatsaih niin, Lunglei HPC Vice Chairman Pu V. Malsawmtluanga MLA chuan Khuallian niin hun a hmanpui.

Khuallian Pu V. Malsawmtluanga chuan Mizote'n basketball kan tuipuina la rei lo mah se, hlawhtlinna ropui tak tak kan lo nei tawh tiin, basketball chu khawvel hriata inpho chhuahna atan leh ei zawnna atan kan hmang thei a ni, a ti a. Mi thiamte'n khelmual hi khawvela zirna hmun ṭha ber an tih angin infiamna kal tlangin taksa leh rilru lama hmasawnna nasa tak a thlen theih thu leh ruihhlo dona kawngah pawh infiamna chu hmanraw ṭangkai tak a nih thu a sawi a. Sawrkarin infiam mi ṭanpui ngai, ṭanpui tlakte ṭanpui zel a tum tih sawiin, ṭhalai kal khawmte chu sawrkar ruahmanna hrang hrang awmte ngaihven a, ṭangkaipui tum turin a chah a ni.

HPC-MBBA Inter-District Basketball Tournament 2024 hmawr bawknaah hian 20th Battalion Assam Rifles-a Second-in-Command Lt Col. Raju Mondal chu khual zahawm a ni a. LDBBA Joint Secretary Pu Gilbert Renthlei kaihhruaia hun hmanah hian LDBBA President Pu Moses Lalrinchhana Chinzah chuan inlawmna leh lawm thu sawiin, MBBA President Pu R. Lalnunpuia leh MBBA General Secretary Pu Zomuanpuia te'n thu tawi an sawi a. October ni 17, 2024-a chatuan ram pan ta, Champhai Basketball Association-a General Secretary Tv. DK Lalchhanhima sunna hun hman a ni a. MBBA Referee Certificate semna hun hman ni bawkin,  Chaltlang Basketball Club, Aizawl leh Ramthar Basketball Club, Lunglei te'n chak ber zawnna final match an khel zui nghal a ni.

HPC-MBBA Inter-District Basketball Tournament 2024 hi October ni 29 aṭanga November ni 2, 2024 inkar chhungin Chanmari Hall, Lungleiah khelh niin, district hrang panga - Aizawl, Lunglei, Champhai, Kolasib leh Lawngtlai aṭangin team sawm (10) te'n he tournament hi an khel a. Final-ah hian Chaltlang Basketball Club chuan Ramthar Basketball Club chu 73-59-a hnehin, a pum puia chak ber (champion) an ni a. Tournament chhunga player ṭha ber, Most Valuable Player (MVP) atan Chaltlang Basketball Club-a Jersey No. 3 Dennis Vanlalchhuanga chu thlan a ni.

Attachment

  • Loading attachment...