1124/2025-2026

Lunglei, 2025 Vawkhniahzawn thla ni 10: Vawiin khan India ram pum huapa leilung dan mila lo neih kalpui tura hma lakna, 'National Mission on Natural Farming (NMNF) 2025-2026' chu Lunglei District tan Lunglei High Powered Committee (HPC) Vice Chairman Pu V. Malsawmtluanga chuan a hawng.

Lunglei District Agriculture & Farmers Welfare Department huaihawta BCM Hall, Serkawn, Lungleia NMNF hawnna inkhawm buatsaihah Lunglei HPC Vice Chairman Pu V. Malsawmtluanga chuan Mizoram sawrkarin kut hna thawktute dawm kan a ngai pawimawh hle tih sawiin, 'Bana Kaih (Handholding) Scheme' hnuaiah kut hna thawktute thar chhuah thlai thar leisakna tur ruahmanna siamin, thlai thlan bik ṭhenkhatah thlai man dona (support price) ṭhahnem tak a pek tawh thu leh sawhthing bikah pawh kuminah cheng vaibelchhe 96.4 a pek tawh thu a sawi a. Central leh state sawrkar kal tlangin kut hna thawktute dawm kanna leh hma lakpuina tur ruahmanna kalpui a la ni zel dawn tih sawiin, kut hna thawktute chu sawrkarin phur taka hma a lakpui theih nan puih tlaka hna thawk tur leh sawrkar hma laknate ṭawiawm zel turin a chah a. Lunglei District-ah lo neih leh ran vulhna atana hma lakna tur hmunhma la hman ṭangkai loh ṭhahnem tak a awm tih tar langin, Mizoram ei leh bara a intodelh theih nan thar chhuah hlawk leh hrisel tak nei tura leilungin a ngeih zawng taka ram ruak la awmte hmang ṭangkai zel turin a chah bawk a. Sawrkar leh department laka pangchang ngam tur te, NMNF kalpui turah pawh rim taka thawk a, kawng kal nei taka hma la tur te'n a chah bawk.


Lunglei District Agriculture Officer Pu VL Hmangaihchhunga'n hun kaihruaiin, Baptist Church of Mizoram (BCM) Associate General Secretary (Service) Rev. Vanlalmuankima'n hunserh a hmang a. Krishi Vigyan Kendra (KVK) Lungleia Senior Scientist & Head Dr Henry Saplalrinliana chuan NMNF hnuaia hma lakna kalpui dan tur sawi zauvin, Lunglei District Horticulture Officer Pu Lalṭhakima'n lawm thu a sawi bawk.


Vawiina Lunglei District tana NMNF 2025-2026 kalpui tur hawnna hunah hian sawrkar official-te, khawtlang hruaitute, tlawmngai pawl hruaitute, MJA member-te leh Serkawn zau (cluster) chhunga kut hna thawktu mi 80 vel an kal khawm a. Chawhnu lamah kut hna thawktute tan NMNF kalpui dan tur zir hona buatsaih zui niin, KVK Lungleia Subject Matter Specialist (Agronomy) Pu F. Lalṭhasanga, Agricultural Technology Management Agency (ATMA) Lunglei Block Technology Manager Pi Zonuntluangi Pachuau leh Animal Husbandry & Veterinary Department-a Veterinary Doctor Dr LH Lalrosanga te'n natural farming awmzia te, NMNF Scheme chungchang te, ran vulh pawimawhna leh hriat tur pawimawh hrang hrangte a lem nen entirin an sawi fiah a. Zawhna leh chhanna leh sawi hona hun hman a ni bawk.

NMNF Scheme hi India ramah leilung dan mila lo neih dan tlo, him leh hrisel a awm theih nana hma lakna niin, thlai chinna leilung tihṭhat leh tihhrisel te, chhehvel leilung, ngaw leh nungcha chereu tawh siam ṭhat te leh kut hna thawktute senso tihtlem te a tum a ni a. Lei, tui, ngaw, thlai, ran, ramsa, sik leh sa leh mihring te mamawh inphuhruk tawn thei tura thlai chin leh ran vulh kal kawppuina tur niin, thlaite chu damdawi (chemical) tel lo va, ran ek leh hnim ṭawih leiṭha (organic manure) hmanga chawm a, ran chaw tur pawh thlai thar chhuahte'n phuhruk tel nghal thei tura kawng kal nei taka hma lakna tur a ni.

NMNF 2025-2026 hnuaiah hian Lunglei District-ah zau (cluster) 15-ah hma lak phawt tur niin, zau khatah hian khaw 4/5 vel zel awmin, a zavaiin khaw 65-ah hma lak a ni dawn a. Zau tin atan kut hna thawktute zirtira kaihruai thei tur, cluster resource person (CRP) pahnih ṭheuh ruat fel tawh niin, training pawh pek tawh an ni bawk.



Attachment

  • Loading attachment...