2825/2024-2025
2024 Sahmulphah thla ni 4: Lunglei High Powered Committee (HPC) Vice Chairman Pu V. Malsawmtluanga MLA chuan vawiin khan Lunglei District Cooperative Union Limited (LDCU) office a tlawh a, board member leh thawktute nen inkawm hona hun an hmang.
Lunglei HPC Vice Chairman Pu V. Malsawmtluanga chuan hna thawktu intel khawma hma lakna (cooperative society) chu ram chhung ei leh bar hmasawnna atan leh mipuite din chhuahna atana pawimawh tak a nih thu sawiin, ram changkang apiangah cooperative society kal tlanga hma lakna a lianin, sum leh pai thawh chhuahna kawngah leh sawrkar tha tihchakna kawngah pawh an thawh hlawk tih a sawi a. Mizoramah kohhran leh tlawmngai pawlah thawh hona ṭha tak kan neih laiin, sumdawnna leh ei zawnna atana thawh ho dan kan thiam tawk lo tiin, Mizoramah a din chhan anga kal lo leh sawrkar ruahmanna kal tlanga sum hmuh nan chauh din nia ngaih theih society a tam niin a lang, a ti a. Cooperative society kal dan tur dik takin kalpui i la, ei zawnna tam tak siam belh niin, ram chhung ei leh bar dinhmun pawhin hma a sawn ngei ang tiin, cooperative society hlawhtling nei tur chuan a tir aṭanga hlawkna insem dan tur thlenga ruahmanna felfai tak duan lawk a ṭul thu leh mipuiah inzirtirna nasa zawka kalpui a ṭul thu a sawi a. LDCU hruaitute chu mipuiin cooperative society an hriat chianna tur leh cooperative society kal tlanga hmasawnna a awm zel theih nan theih tawp chhuah tura chahin, an duh leh mamawh leh thil ṭul chu inthlahrung lova a hnena thlen ṭhin turin a chah a ni.
He inkawm hona hun hi LDCU Vice President Pu C. Lalnghakliana'n kaihruaiin, Lunglei HPC Vice Chairman-in an office-ah ngei kal chilha cooperative society kal tlanga Lunglei leh chhim lam hmasawnna tur a ngaihtuahpui avanga an lawm thu a sawi a. LDCU Executive Officer-cum-Secretary Pu K. Malsawmdawngliana'n LDCU dinhmun, an hma lakna leh hmachhawpte a tar lang a. LDCU Board of Directors kal khawmte chuan Lunglei HPC Vice Chairman hnenah hian an mamawh hrang hrangte thlenin, Lungleia Cooperative Inpui (Cooperative Multipurpose Centre) din a nih theihna tur leh an hmachhawp hrang hrang tihhlawhtlin a nih theih nana hma lak dan tur te an sawi ho va. Lunglei HPC Vice Chairman Pu V. Malsawmtluanga chuan LDCU te chu ram leh mipuite hmasawnna atan theih tawp chhuaha hma lakpui zel a tum thu a sawi a ni.
Lunglei District Cooperative Union Ltd hi Mizoram sawrkar hnuaia Grant-in-Aid Centre for Cooperative Education niin, Mizoram Cooperative Societies Act hnuaiah ni 31.05.1993 khan din a ni a. Mizoram sawrkarin staff hlawh leh in luah man, adt. a tumsak a. Tun dinhmunah President Pu K. Darlawma leh Vice President Pu C. Lalnghakliana bakah, Board of Directors 8 leh co-opted member 1 awm mekin, staff 5 an awm bawk a. Cooperation Department aṭangin Executive Officer in Administrator-cum-Secretary angin Pu K. Malsawmdawngliana'n a ṭhut chilh bawk a ni.
LDCU hnuaiah hian Cooperative Education Instructor (CEI) pakhat awmin, cooperative society din turte tan hriat tur pawimawh kawhhmuhin kaihhruaina an pek bakah, society member-te tan training te an pe ṭhin a. Dilna form leh model bye-laws te pawh office-ah hian zawrh nghal niin, cooperative society din duhte tan pan theih reng an ni.
Attachment
- Loading attachment...
