4883/2024-2025

Lunglei, 2025 Vau thla ni 28: Vawiin khan Lunglei District-a Zotuitlang khuain kum 50 an tlin (golden jubilee) lawmna chu Zotuitlang Field-a "Zo Run"-ah hman niin, Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan khuallian niin a hmanpui.

Khuallian Pu V. Malsawmtluanga chuan golden jubilee lungphun (monument) khuh hawngin, Zotuitlang khaw kum 50 tlin hriat rengna souvenir, "Zo Run" chu a tlangzarh bawk a. Zotuitlangin kum 1975 aṭanga mei mit lo leh harsatna leh khuarel chhiatna te thleng lova golden jubilee an thleng thei chu a lawmpui thu sawiin, Zotuitlang khua dintute leh khawtlang hmasawn nana hruaitu lo ni tawh zawng zawngte zahna chibai a buk a. Zirna, infiamna leh hmasawnna kawng hrang hranga khaw hlawhtling leh chhuanawm ni zel turin duhsakna a hlan a ni.  

Pu V. Malsawmtluanga chuan bialtu MLA a nih anga Zotuitlang khaw tana hma a lak tawhna ṭhenkhat tar langin, Zotuitlang khaw tui harsatna phuhru tur leh tui hnianghnar tak an neih nana hma lakna kalpui tum a nih thu te, link road laih chhunzawm zel tura hma lak a nih tur thu leh Zotuitlang khaw hmasawnna tura theih tawp chhuahpui zel a tum thu te a sawi a ni.

Bialtu MLA Pu V. Malsawmtluanga hma laknain Zotuitlang khaw tan hian Valcheng tlang link road chu laih niin, phase 1, 2 & 3 awm tura ruahman a ni a. Zotuitlang khaw chhungah PCC Pavement metre 100-a thui chhun a ni bawk a. Nikum lam khan Zotuitlang English Medium School Principal kum khat hlawh tumsakin, Zotuitlang High School silver jubilee lawm nan pawisa fai a pe bawk a. Tun ṭuma Zotuitlang golden jubilee lawmna atan hian ₹ 3,00,000/- (nuai thum) a pe bawk a ni.

Zotuitlang khaw golden jubilee ni tak chu February ni 17, 2025 kha niin, zirlaite exam lai a nih avangin a lawm hun hi ni dang ruahman a ni a. Zotuitlang kum 50-na lawmna pual hian March ni 27 (Ningani) zan, March ni 28 (Zirtawpni) chawhma, chawhnu leh zan lamah te vantlang inkhawm buatsaih a ni a. Zirtawpni tlaiah hian jubilee lawmna ruai buatsaih a ni bawk.

Zotuitlang hi kum 1975 February ni 17 aṭang khan mei mit lova dingin, tunah hian in 136 leh mihring 650 vel an awm mek a ni.