No.4008/2021-2022 

Aizawl the 16th February 2022 :-  Vawiin dar 11 : 00 AM khan Civil Hospital Lunglei a thawktu Doctor leh Nurse te chuan  MJA Lunglei Member te tan Free Health Check-up an buatsaih sak.

Dr.SR. Ngurchamliana Medical Superintendent, Civil Hospital, Lunglei chuan Free check-up neih hma inkhawm tawi Hospital tualzawla buatsaih ah thusawiin, kan Hospital tan ni chhinchhiahtlak tak mai hun danga kan la tih ngailoh MJA Lunglei member te puala Free Health Check-up kan buatsaih thei chu thil lawmawm tak a ni a, hetiang hi MJA Member te tana neih sak hi kan duhna a rei tawh a, vawiinah a tak kan thleng thei ta hi kan lawm tak zet a, he Free Health Check-up ah hian investigation hrang hrang leh tul dang a theih apiang te hmanga tih a nih tur thu a sawi a ni.

Dr.SR. Ngurchamliana chuan MJA te chu Civil Hospital Lungleiin tun dinhmun a then theihna  kawng hrang hrangah sulsutu pawimawh tak an ni a, an chungah lawmthu kan sawi a ni a ti a,  Covid 19 hrileng avangin Civil Hospital Lunglei a thawktu mi 82 zet ten hri an kai tawh tih sawiin, tun dinhmunah mi 5 hri vei an awm mek thu leh  Mizoram pumah pawh hrileng avangin Doctor 200 chuang ten hri an kai tawh a, Doctor 5 in nunna an chan phah tawh thu sawiin, hripui avanga tawrhna hi a nasa hle a ni a ti bawk.

Dr.SR. Ngurchamliana chuan India ram puma Hospital tha tehna hrang hrang ah Civil Hospital, Lunglei chu beiseiawm tak a nih mek thu leh Civil Hospital, Aizawl chuan Hospital tha tehna-ah thlan an ni tawh a, mahse kum 3 term a nih angin Hospital tha hi thlan thar zel a ni tiin, Civil Hospital, Lunglei chuan State Level tehna a paltlang tawh thu leh tunah hian National Level kan hmabak mek a, theih tawpin kan inbuatsaih mek tih sawiin, MJA te nen nasa leh zuala thawkho turin a sawm a ni. Hospital tha tehna hrang hrang ah hian NGO leh Pawl ten tha an thawhna thlengin mark pu a awm a, hemi a nih avang hian MJA leh NGO dang ten  hei hi hriatpui ve se a duh thu a sawi bawk.

Free Health Check-up ah hian Pu.Laltlanthanga, President, MJA Lunglei pawhin thusawiin, Lunglei-ah MJA te pual a, a vawikhatna atana Free Health Check-up neih theih a ni chu lawmawm a tih thu leh hemi atana hmalak saktu Dr.R. Lalthangliana, Health Minister chungah leh   Dr.SR. Ngurchamliana, Medical Superintendent, Civil Hospital, Lunglei leh a thawhpuite inpekna leh hmalaknaah lawmthu a sawi a, MJA Lunglei chuan Civil Hospital, Lunglei tana tangkaina an neihna apiangah theih tawp chhuah an inhuam thu leh thawhhona tha neih zel chu an duh tih sawiin, hun lokal zel turah pawh Free Health Check-up MJA Lunglei te puala neih theih an beisei tih a sawi a ni.

MJA Lunglei member te puala a thlawna hriselna endiksak buatsaih ah hian member 16 ten an hriselna dinhmun endik turin hming an pe lut a, investigation hrang hrang leh tul dang te buaipui a endik hna thawh sak an ni.