3849/2022-2023

Lunglei the 15th March' 2023: Vawiin chawhnu khan Convention Centre Lunglei ah Lunglei Municipal Council (LMC) Election 2023 Candidate leh Election Agent te pualin Election kaihhnawih a hriattur leh zawmtur hrang hrang training neih a ni.

Training hi Pi C. Lalduhzuali, Election Officer, Lunglei chuan kaihruaiin Pi Ramdinliani, District Municipal Election Officer and Deputy Commissioner, Lunglei chuan Lunglei Municipal Council Election hi kan vawikhat hmachhawnna a nih avangin Municipal Election a official kaihhnawih, Candidate leh Election Agent te tan thil thar a ni a. Amaherawchu State Election Commission in guideline fel tak a siam a, inthlan felfai leh muanawm kan neih theih nan guideline zawm theuh turin a chah a ni.Expenditure chungchang sawiin candidate tin ten cheng nuaikhat aia tam hman loh tura tih a nih avangin penalty pek ngai lova zawm hram hram turin a chah bawk a ni. Model Code of Coduct in tih loh tur a tih te pawh zawm a mimal insawichhiat leh Candidate te mualpho zawnga che lo turin Election Agent te a ngen a ni.

Vawiin Training hi Pu M. Misael, Project Director, DRDO Lunglei in Model Code of Conduct, Pi Melody Ngurthantluangi, SDO (Sadar), Lunglei in Candidate leh Election Agent te hriattur leh zawm tur leh Pu Vanlalrosiama Ralte, Treasury Officer, Lunglei in Expenditure chungchang ah te zirtirna an pe a ni. Zawhna leh chhanna hun hman a ni bawk.